Тöдмасьöй: Василий Кимович Липин — Кулöмдiнса лесничествоöн веськöдлысь (снимок вылын). Чужис юрсиктын 1960 вося март 13 лунö. Кулöмдiнса шöр школа помалöм бöрын босьтiсны армияö. Служитiс Прибалтикаын сынöдса десантлöн войскаын. 1980 воын армияысь локтöм бöрын помалiс Киров обласьтса Суводскöй лесотехникум. 1983 вося мартсянь пыр на уджалö Кулöмдiнса лесничествоын лесничöйöн, öти кадö сöмын мастеравлiс. А гöтырыс, Любовь Борисовна, пыр вöлi удж кузяыс отсасьысьöн. Василий Кимович вочавидзö вöр-вакöд йитчöм юалöмъяс вылö.

— Василий Кимович, Тi висьталiнныд, мый техникумын велöдчинныд Кулöмдiнса лесхозлöн мöдöдан гижöд серти. Сiдзкö, бура тöдöмöн нин бöрйинныд велöдчанiнтö, вöр-ваыскöд йитöдаöсь нин вöлiнныд?
— Дерт жö. Вöр-ваад менö батьö, Ким Дмитриевич Липин, новлöдлiс ичöтдырсянь. Чöс туй эз вöв, а кыйим чери да вотчим. Вöр-ваас меным дзолядырсянь гажа. Кыдз шулöны, сэнi лов вылын кыпыд. Со и бöрйи удж, мед вöчны сылы бур.
— Кöкъямысдас коймöдсяньыд талунöдз колис комын куим во. Кыдзи вежсис вöрöн вöдитчöмыс, сэнi кутчысьöмыс?
— Веськыда висьтала, мый öнiя серти вöрад ёна бурджык вöлi коммунистъяс дырйи. Босьтам татшöмтор. Ми уджалам сы серти, мыйöн могмöдöны вöрсö донъялысьяс — сiдз шусяна лесоустроительяс. 1991 воöдз найö уджнысö вöчисны, позьö шуны, четыре», «четыре с плюсом» вылö. Ставыс лöсялiс, мый гижöма документын и мый збыльвылас эм вöрас. А 2006 вося уджысь Москваса лесоустроительяслы эськö пуктi «два». Визиръяс весавтöмöсь, пасъяса сюръяяс пöрласьöмаöсь, кызвынсö пасъялöма ылöсас. Водзтi тайö уджсö кывкутöмöн вöчлiсны Вологдаса да Севернöй лесоустроительнöй партияяс. Сюрлöны кольöм нэмся квайтымынöд воясын наöн сувтöдöм сюръяяс. Век на сулалöны, и пасъясыс тöдчöны. Водзтi визиръястö век весалiсны, на вылын сулалiсны пикетъяс. Ме муна визир кузяыс да тöда: татчöдз кыксё метра, а сэсся лоас нёльсё. Делянкаяс юклiгöн эз ков мерайтчыны, ставыс вöлi тöдса. А öнi мукöддырйи визирсö лоö корсьны лун джын. Мукöдлаас öд мунны весиг он куж — гöгöр пöрöдöма.
— Пöрöдчöм йывсьыс и висьталöй. Водзтi тiян лесничествоын кызвыннас пöрöдчисны Кулöмдiнса леспромхозлöн лесопунктъяс, а öнi кодъяс? Колана ногöн-ö пöрöдчöны?
— Öнi пöрöдчöны сiдз шусяна частникъяс — аукцион пыр вöр босьтысьяс, сiдзжö керка лэптысьяс да пес вöчысьяс. Вöлi А.А.Гудыревлöн ыджыдкодь вöр заптысь котыр, öнi сэтшöмыс абу, уджалöны посни котыръяс. Лесничестволöн вöръясын котыръясöн пöрöдчöны сизимöн. Шöркодя во чöжöн найö öтув пöрöдöны 40 сюрс кубометр вöр. Ми на бöрся видзöдам öтырышъя. Урчитöмасö торкалысьыс, дерт, эмöсь. Миян гижöдъяс серти найöс кыскöны кывкутöмö, мынтöдöны штрапъяс. Эмöсь и кывйö сетчысьяс. Татшöмъяс лыдас, пример вылö, Максим Викторович Родионов. Сiйö ставсö вöчö мекöд сёрнитчöмöн да öти кывйö воöмöн. Абу кыськö локтöм, а Паспомса. Делянкаяс сдайтö бура.
— А овлö-ö сiдз, мый пырöны вöрö аснаукöн?
— Гежöдика, ми сэтшöмъяссö куталам. Бур сiйö, мый сэтшöмъяс йывсьыс юöртöны йöз да ми пырысь-пыр жö мунам видзöдлыны. Вöр-ва вöсна тöждаяс висьталöны и мукöд лёкторъяс йылысь. Таысь налы зэв ыджыд аттьö.
— Вайöдöй кöть öти пример.
— Воддза воас Носим сиктса муяс сайысь танi крестьянин овмöс кутысь А.М.Бабаханов пöрöдiс делöвöй вöр. Этшаника, но вöчис сiйöс, мый оз позь. Дерт, дасьтiм гижöд да сетiм полицияö. Тадзи жö мукöдыс пöрöдöны кык-куим пу. Кызвынсö кыям. Кодъясöскö дзик асьным, кодъясöскö йöзлöн отсöгöн.
— Бöръя кадас кутiсны ёна кыпöдны керкаяс, торйöн нин Кулöмдiнын, и кызвынсö пуысь. Кыськö сюрö на вöрыс?
— Збыльысь, стрöитчöны ёна. Ми таво кежлö керка лэптысьяслы да пес вöчысьяслы öтлаын босьтiм 120 гектар вöр. Кольöм воын, пример вылö, 28 мортлы сетiм 150 кубометр. Мыйöн кынмалыштас, лесник пыр жö босьтчö пасъявны делянкаяс. Таво Кулöмдiнса олысьяслы бара сетiсны керка лэптöм могысь зэв уна му юкöн. Найö кызвыннас локтасны миян дорö корны вöр, а сiйöс корсьны вель нин сьöкыд. Но сюрö на, сы вöсна мый бура важöн нин уна квартал вермим вынсьöдны сы могысь, медым йöз вермисны пöрöдны кыдзи стрöитчан, сiдзи и пес вöр. Тайö кварталъясас на кындзи правоыс пöрöдчыны некодлöн абу, сiйö абу некодлöн, сiйö жö «Мондиыслöн», кöртым улын. Татшöмыс 21 квартал. А кварталыс, кыдз асьныд тöданныд, нёль километр кузьта да кык километр пасьта. Верма на могмöдны татшöм вöрнас, кодi абу ёна ылын, уна вылö сизим верст сайын, этша вылö вит во, татшöм ёна кö кутасны быттьö стрöитчыны и водзö. Йöзлы пöрöдчöм могысь медся ылi кварталыс — Льöмтыкерöс, кöнi медсясö бергöдчöны донсаяс. Керчомъяса выль туй пöлöн пöрöдчыны йöзлы позьö Вуктылöдз.
— Кутшöмджык вöръяс лесничестволöн? Ёнджыкасö парма выв али ягвыв?
— Эм и парма вылыс и ягвылыс. Ме эськö шуи — сора вöр. Бурджык вöрсö, дерт, пöрöдiсны водзынджык нин. Öнi, позьö шуны, артмö öктысьöм кодь. Водзтi козтö эзджык пöрöдны да сiйö зэв нин пöрысь. 116-öд кварталысь ме лöсьöдлi водзынджык нин пöрöдны нёль делянка, а таво видзöдлi да, кык делянкасö ставнас тшыкöдöма пучöй, вöрыс косьмöма. Но дзик вöртöг ог кольöй. Уна сэтшöм вöр, кодöс пöрöдтöдз колö виччысьлыны во кызь. Оз ков повны, мый вöр бырас. Сiйö век быдмö, сы вылö миянöс и видзöны, медым эз быр, а вöлi век.
— Сöмын тай пöрдöм бöрас бур вöр пыдди быдмö рос-бадь, кыдз, пипу, пелысь, весиг нитшсялö ягвыв…
— Да, тайö тадзи, но на подулын быдмö лыска вöр. Кор во квайтымын мысти пöрöдасны коръя вöрсö, бара быдмасны коз да пожöм. Миян тайö шусьö пöрöда вежсьöмöн.
— Ме некыдз ог гöгöрво вöрысь рос кералöмсö. Шуöны: мед пö оз падмöдны лыска вöрлысь быдмöмсö. А кералöм бöрас кыдзьяс да пипуяс быдмöны пашкырджыка.
— Ме думысь, керавны колö сöмын сэтi, кытчö лöсьöдöны пуктыны лыска пуяс, мед эз падмöдны вужъясьöмсö да быдмöмсö, а мукöдлаас вöр-ваыс ачыс ставсö колана ногöн вöчö, рочöн кö шуны, регулируйтö.
— Менам видзöдлас вылö, вöрсö важöнкодь нин виöны öтпомся ставсö кералöмöн, сiдз шусяна «сплошнöй рубкаöн».
— Збыльысь, тадзсö виöм и артмö. Водзтi пöрöдлiсны дiясöн-дiясöн сöмын сэтшöминъяс, кöнi вöрыс сöвмöма нин. Тайö шусьылiс бöрйöмöн пöрöдöмöн. Прупт бокысь ставсö пöрöдлiсны тадзи. Та вöсна сэнi эм звер-пöтка и тшак-вотöс. Таысь мортлы сьöлöм вылас бур, öд сылы вöрыс абу сöмын куб да руб, тшак да вотöс, но и кыпыд лов, сьöлöм шонтантор. А öнiя пöрöдчöмöн гöгöр восьса эрд, став ловъяыс вешйö, нинöм оз быдмы.
— Форвардеръяс да харвестеръяс вайтöдз ёна ошкисны, мый найö том вöрсö оз жуглыны, а збыльвылас артмö мöдарö.
— На бöрся кольö пустыня, ставсö талялöны «кок ула-ныс». Ловйöн кольöны сöмын зэв посни пуяс.
— Ставныд тöданныд, мый тадзи уджалöмнас артмö зэв ыджыд лёктор, а дугöдны он вермöй?
— Кыдз нö дугöдан, кор ставыс мунö «вылiсянь» индöмöн. Вöрса выль кодекс мунö йöзлöн корöмъяслы паныд. Сiйö, рочöн кö шуны, — туфта! Босьтам воддзасö. Миян лесничествоын водзтi вöлi кöкъямыс лесник, лесничöй, сылы отсасьысь да кык мастер, а öнi колим сöмын куимöн: ме, отсасьысь да лесник. Мöд ногöн кö, вöрын пöрадок бöрся видзöдысьыс эз ло. Этшанад этша жö и удитан вöчны, видзöдласыд быдлаö оз тырмы. Водзтi вöлi дзик ставыс тöдса, кöнi мый вöчсьö. Кодкö кö кöсйö öзтыны кыткö, ми тöдам нин да ог лэдзöй вöчны тайöс либö пыр жö кутам мыжсö вöчигöн. Некутшöм падмöгъяс эз вöвны ломтасöн да запаснöй часьтъясöн. А öнi УАЗ-лы 17 во нин, öдва ловъя, öтарö вöчам, сы вöсна мый лёк туйяснад помся жугласьö.
— Ёна кутiсны гижны, мый ыджыд тöдчанлун кутiсны сетны вöр пуктöмлы. Торйöн кö, ошкöны «Мондиöс». Öнi öд сiдзи, кодi пöрöдö, сiйö и пуктö. Тiян вöръясын «Монди» абу. А ёна-ö пуктысьöны, кыдз Тi шуанныд, посни котыръясыс?
— Миян лесничествоын вöрсö кöртымö босьтысь öти котыр — В.А.Муртазинлöн «КВМ». Мый урчитöма та кузя, сiйö вöчö ставсö. Та бöрся видзöдам стрöга. Мед лöсьöдны пуктысянiнсö, медавлiс асшöр уджалысь Р.В.Третьяковлысь бульдозер, том пуяс вайис Сыктывкарса быдтысянiнысь, кыпöдлiс пуктыны велöдчысьясöс, а ми видзöдiм. Но ичöт котырсяньыд ичöт и водзöс. Кебанъёль дорын вöр завод кыпöдöмкöд йитöдын уна вöр эськö босьтлiсны кöртымö полякъяс, но заводсö кыпöдöмыс эз артмы да тайö вöръясыс öнi абу кöртым улынöсь. Сiдз кö нин шуны вöр садитöм йылысь, то пуктöны сiйöс зэв на этша, вöр медсясö быдмö ачыс.
— Вöр кöртымö босьтысьяслы колö дорйыны сiйöс и öзйылöмъясысь. Та кузя кыдзи?
— Тайö жö вöр пöрöдысь котырыслöн öти пöрöдчанiнын öзйылiс. Пыр жö юöртiсны миянлы да котыртiм отсöг. Волiсны весиг вöр доръян республикаса шöринсянь.
— А лесничество пасьта ёна-ö сотчö вöрыс?
— Ёна сотчис 2010-öд воын. Кöть сотчис этшаника, но уналаын. Ёна сотчис Нюмыдын да Крутоборкаын. Бур, мый та вылö эм торъя служба. Сэтчöс йöз медсясö и кусöдчöны, а ми отсасям.
— А мый вöсна öзйö вöрыс?
— Менам видзöдлас вылö, джын öзйöмыс йöз вöсна, кодъяс кусöдтöг кольöны бипуръяс, шыблалöны куританторъяс, сотöны кос турун, öзтöны тöдöмöн. Матiгöгöрса вöръяс сотчöны дзик та вöсна. Помнитанныд, кöнкö, Дон туй бокысь нюр сотчöмсö. Пузьöдлöмаöсь чай да кусöдтöг кольöмаöсь бипурнысö. Ковмис кусöдны вель дыр. Уна öзйылöм гымньöвсянь. Торйöн нин сьöкыд кусöдны пöрöдöминъяс, кöнi ставыс косьмöма да биыс нюлöмöн-нюлö.
— А кутiнныд-ö кодöскö киöдыс öзтасьöмысь да бипур кольöмысь?
— Тайöс вöчны зэв сьöкыд, на корсюрö лёк вöчысьяс векжö сюрлöны. Сiдз, Подкадамьеын вöлi вöралысьяслöн да чери кыйысьяслöн керка. Сэтчö волöмаöсь вотчыны да гижöмаöсь тетрадьö, кодъяс волöмаöсь. А öзйöма вöлi орчча вöрыс. Кыдз шулöны, асьныс асьнысö кöмöдiсны.
— Мортлöн идöртöм Сидöр моз олöм вöсна и вöр-ваыс кутiс вежны сямсö, позьö кö быттьö тадзсö шуны. Водзтi пув быдмис мича ягъясын, а öнi петö пöрöдöминъяс гöгöрын.
— Сiдзи и эм, петö сöмын пöрöдöминъяс гöгöрын. И йöз босьтiсны тайöс тöдвылö да вотчöны сэтысь. Ме ачым ог гöгöрво, мыйла тадзи, но ылöсала, мый нитш вылын сiсьмысь пуяс бокын кутчысьöджык ва, озджык сот шондi.
— Пувйыд да мукöд вотöсыд колö öд оз сöмын мортлы, но и звер-пöткалы. Тi öд асьныд кыйсьысь. Эм на тiян вöръясын звер-пöткаыс?
— Дерт, воддза серти ёна этша. Ме аслам позянлунъяс серти муна вöралысьяслы и вöр-ваыслы воча. Тöда кö, мый сэн либö мöдлаын койт, то пöрöдны сэтысь делянкасö ог сет. Ми директоркöд та йылысь сёрнитчылiм важöн нин. Кöнi бур койтъяс, кута весиг быдса кварталъясöн. Татшöминъясыс медсясö Пруптланьын.
— Вöр керкаяс ёна сотöны, тiян вöръясын, кöнкö, тшöтш жö?
— Ме ветлöдлi вуграсьны Лöкчимлань да гöгöрсьыс ставсö сотiсны, эз коль ни öти керка. Кöнi овлiсны мыждöмъяс бöрся видзöдысь офицеръяс, сэнi ми узьлывлiм да ставсö жö сотiсны. Татшöм жö серпас и ас районын. Сотiсны вöр керкаяссö кызвын кыйсьысьыслысь нин. Ассьым сотiсны жö да ковмис вöчны выльöс.
— Овлiс-ö сiдз, мый ассьыныд уджнытö вöчигöн кодкö «стенмö кайлiс» либö весиг кинас волiс?
— Йöзкöд-пöрöдчысьяскöд ли вöралысьяскöд — ми сёрнитам, кыдз шуласны, морт ногöн да пиньö-зыкö ог волöй. Босьтны кö бöръя вит-квайт восö, кыйсьöм тупкöм бöрын озджык ветлöдлыны ружьеöн.
— Тi весиг отсасянныд район-са охотоведлы. Павел Дмитриевич висьталiс, мый кытшовтiнныд вöр-васö тувсовъя кыйсьöм восьтöм бöрын.
— Да, ме тшöтш кок туйяс серти артала тöвнас, уна-ö звер-пöтка миян вöръясын. Тайö сылы колö и меным тшöтш, мед тöдны, мый эм, мый вöчны, медым лоис унджык. А мыйсюрö колö чинтыны. Ёна рöдмис мой. Помöны ёльяс да вöрыс косьмö, косьмö зэв уна. Ме мойяслысь помöдъяссö весиг жугла. Сöмын тай зэв öдйö бöр вöчöны.
— Мойяссö позьö жö гöгöрвоны: ваыд öд юяссьыд да ёльяссьыд чинiс зэв ёна, и медводз вöр пöрöдöмла.
— Ме воа Тiянкöд öти кывйö, но тöдчöда: вöрсö кö босьтны оз öнiя моз пасьвартöмöн, а сы вöсна тöждысьöмöн, то васö вермас кутны да юясным оз сэтшöма чинны, кыдзи öнi. Öнi öд юясыд ляпкалiсны дзикöдз. Сiдз, Керчомъя весьтсянь Кöтйöм вомöдз вит кымын километр мотора пыжöн мунны он вермы.
— Сёрни помланьын, Василий Кимович, ме Тiянлысь юала со мый: мый колö вöчны, медым вöр-ваыс вöлi шаня олысь морт моз жö кыпыд лола. Эз öнiя моз бöрд?
— Колö государстволöн вöр-ва вöсна збыльысь тöждысян, гöгöрбок зэв джуджыда мöвпыштлöм политика. Мед вöлi воддза моз вöр овмöс кузя министерство. Öнi кесйöдлö кодлы абу дыш, а мед ставыс вöлi öти киын.
— Тi мукöд службаяслы отсасянныд, а отсасьöны-ö Тiянлы?
— Отсасьöны и меным, и ме тöдчöда, мый медся ёна отсасьöны йöз: бурсö и лёксö юöртöмöн, а медся ёнасö — вöрын вежавидзöмöн олöмöн.
— Кутшöм йитöдъяс меставывса власьткöд?
— Миян лесничество улынöсь Кулöмдiнса, Носимса да Донса овмöдчöминъяс. Медся бура, пöжалуй, гöгöрвоам öта-мöднымöс Донысь Василий Николаевич Нехорошевкöд. Некутшöм майшöг эз вöв, кор Носимын юралiс Пётр Магометович Гилев. Кулöмдiнын бурöсь вöлiны йитöдъяс татчöс администрацияöн Сергей Владимирович Рубанлöн веськöдлiгöн. Öнi кодi веськöдлö, ме весиг ог тöд.
— Кыдзи помалам сёрнинымöс?
— Ме шыöдча йöз дорö, мед вöр-ваын олiсны шаня, эз шыблавны куритчанъяс, эз öзтавны некытi, эз кольны кусöдтöг бипур. Кутiсны вежöраныс, мый вöр сотчигöн сотчö став олан подув, öд вöр — абу сöмын звер да пöтка, тшак да вотöс, а мортлöн лолыс, сылöн олан гажыс.
Василий ЛОДЫГИН.