Дереваннöйын чужлöм Ольга Борисовна Попова школа помалöм бöрын велöдчис да нэм чöжыс уджалiс Эжваын экономистöн. Пенсия вылö петöм бöрын ковмис локны чужанiнас видзны пöрысь мамсö. Но аньлы сюрö и кад, медым петавны ас- тшöтшъяяс дорö сиктса клубö. Ольга Борисовна век радейтлiс мыйкö вöчны киöн — кысьыны, вурсьыны, вöчавны быдсяматорсö да öнi велöдö таö дереваннöйсаясöс. Чукöртчылöны клубын вежоннас кыкысь. Босьтчылiс волыны кызь мортöдз, но сэсся кодлыкö дышöдiс, кодлöнкö кадыс эз кут тырмыны, да колисны 12-öн. 
Велöдö быдторйö, мый сяммö ачыс, торйöн нин выльторъяс. Вöчалöны дöраторъясысь серпасъяс, гартлöм газетъясысь дозмук, вурöны да пасьтöдöны аканьясöс. 
Кольöм воын выль во водзын мöвпыштiсны вöчны Лым нылöс. Медводз лöсьöдiсны сутугаысь мыгöрсö, сэсся вочасöн тэчисны тушасö, лöсьöдiсны чужöмсö. Уджыс абу сьöкыд, но зэв ёна колö ноксьыны. Öтитор вöчан-клеитан — колö виччысьны, мед косьмас. А тöвнад гортö он ну, лымнас кöтöдас ли тöлöн чашъяс. Мед эз вöрöдны на бöрын вöчасьны жö локтысь челядь, «нылукъяснысö» лэптавлiсны вылöджык шкапъяс вылö. Вöчасисны матö квайт вежон, и артмисны зэв мича Лым нывъяс! Лым королеваяс да принцессаяс! Абу яндзим петкöдлыны медся матыс йöзлы, мый и вöчисны аньяс — унджык ас вöчöмторсö козьналiсны рöдвужлы. Таво выль во кежлö мöвпалöны вöчны Кöдзыд пöльöс. 
Ольга Борисовна висьталiс, мый медся дона сувтö дöраторъясысь вöчасьöм. Медводдза восö вöчасьны вайлiс ставсö гортсьыс. Медым чуймöдны аньясöс выльторйöн, корсьысьö интернетысь. 
Октябр 26-öд лунö районса культура керкаын асланыс вöчöмторъясöн, пöжасöн да сёян-юанöн петкöдчисны овмöдчöминъясысь олöма йöзлöн котыръяс. Ольга Борисовналöн юрнуöдöмöн дереваннöйсаяс вöчисны, кыдзи найö пасйöны сиктлысь медшöр гаж — Иван лун. Кодкö качайын, кодкö вöла доддьын, кодъяскö пызан сайын самöвар гöгöрын, кодъяскö сувтöмаöсь кытшö, а шöрас бипур. Мед кö öшинь сайын зэр сора лым, дереваннöйсаöн вöчöмторъяс вылö видзöдiгöн кокниа бергöдчылан медся радейтана гожся гажö, Иван лунö. 
Олöма йöзлöн тайö гаж кежлö лöсьöдчисны став котырöн, кодöн юрнуöдö Л.И.Ракина. Водзвыв мöвпыштiсны, мыйöн вермасны чуймöдны воысьясöс да донъялысьясöс. Киöн вöчöмторъясысь öтдор колiс нöшта петкöдлыны, мый найö — бур кöзяйкаяс. Дереваннöйсаяслöн, кыдз и мукöд зiль аньяслöн, гöвбöчаныс да куманыс чукöртöмыс тырмас тöвбыд кежлö. 
Лидия Липина. 
Гижысьлöн снимокъяс вылын: 
О.Б.Попова; дереваннöйсаяслöн Иван лун.