* Великополье километрысь кузьджык. Эжва ю дорöдз матö кык километр. Сулалö ыджыд ыб вылын, тыдалö ылiсянь.
* Великополье юксьö Макарсикт, Вöлöсьтшöр, Кирув да Шорсай ичöтик сиктъяс вылö.
* Талун танi 69 овмöс, 195 олысь, кодъяс пиын 44 уджалысь. 6 морт ветлö уджавны бокö.
* Ас овмöсъясын 12 мöс, 4 öш, 5 кукань, кык вöв, 103 ыж, 3 кöза.
* Медся ыджыд арлыда Евдокия Егоровна Шахова, кодлы февральын тырас 93 арöс.
* 80 арöсысь ыджыдджыкöсь Анфиса Егоровна Дёмина, Людмила Сергеевна да Александра Фёдоровна Мартюшёваяс, Тамара Фёдоровна да Надежда Григорьевна Мингалёваяс, Зинаида Егоровна Пашнина.
* Кольöм воын чужис 3 кага.
* Выль керкаö овмöдчис Светлана Васильевна да Владимир Фёдорович Душевскийяслöн семья. Керка кыпöдiсны Вöлöсьтшöрса ыб вылö.
* Кыпöдны керка босьтiс му юкöн Яна Ивановна Поповалöн семья.
* Садйын 12 кага. Гортын нёльöнöсь, найö дзоляöсь на.
* Бурдöдчанiн да клуб öти керкаын. Бурдöдчанiнын уджалöны кыкöн. Кык во веськöдлö Пожöгысь том фельдшер Александр Михайлович Печеницын. Уна во медсестраöн уджалö Татьяна Борисовна Дёмина. Сьöкыда висьысьяс дорö отсавны локтöны лун кöть вой. Сиктö волывлö флюорография машина. Шыöдчысьясöс врачьяс дорö ыстöны Пожöгса да районса бурдöдчанiнъясö.
* Клубöн веськöдлö А.И.Лобанова. Сиктсаяс асьныс чукöртiсны сьöм, асьныс жö клубын дзоньталiсны джодж, мичмöдiсны пытшкöссö.
* 2010 вося декабрын воссис биысь видзан часьт, кодöн веськöдлö М.В.Попов. Уджалысьяс кыпöдiсны керкасö асьныс. Ставöн велöдчисны. Танi 12 кусöдчысь, кык машина. Уджалысьяс тшöкыда петкöдчöны ордйысьöмъясын да вермöны.
* Сиктсаяс бöрйисны старöстаöн В.А.Дёминаöс. Топыд йитöд кутö администрациякöд, отсалö сиктын котыртны уджъяс, öтувтö сиктсаясöс.
* Ярашъюса школаын велöдчö 13 морт, Пожöгсаын — 1. Таво 11 класс помаласны куимöн. Ярашъюса школаын велöдöны Вера Вениаминовна Мингалёва да Валентина Васильевна Мартюшёва, кодi кыкысь öтпырйö чужтiс кык кагаöс. Пожöгын уна во нин велöдö Валентина Васильевна Тарабукина. Сылöн Иван Тарабукин пиыс гимназия бöрын велöдчис Санкт-Петербургса театрлöн академияын. Öнi снимайтчö киноын, ворсö сэтчöс Мариинскöй театрын.
* Великопольеын ловзьöдiсны Микöла лун гаж. Чуйдiс Пожöгын чужлöм, öнi Кулöмдiнса асшöр уджалысь А.П.Напалкова. Петкöдчöны оз сöмын асьныс, но и Пожöг вожысь сьылысь-йöктысь котыръяс.
* Кольöм воын мичмöдiсны зонпоснилы ворсанiн.
* Йöзöс юрсиктöдз новлöдлö А.М.Игнатов. Ярашъюсянь петiгöн пыравлö быд сиктö.
* Сиктын лöнь олöм вöсна кывкутö участкöвöй уполномоченнöй Э.В.Лажанёв.
* Киподтуйöн нималö Е.А.Пашнин, кодi вöчасьö пуысь.
* Сиктын эм кык вузасянiн, няньöн могмöдö «Барс» котыр.
* Сиктсаяс сöстöма видзöны шойна. Быд тулыс-гожöм сиктсаясöс котыртö асшöр уджалысь А.А.Нехорошева, мед пелькöдчыны, мавтны потшöс.
* Великопольеын пыр на став сиктöн колльöдöны кулöмаясöс мöдар югыдö. Став сиктöн жö колльöдöны зонъясöс армияö да вочаалöны.
Марина ДАДАШОВА.