Гижышта орччöн олысь Василий Иванович Логинов йылысь. Сiйö чужлiс 1931 вося август 19 лунö. Олöмыс эз вöв кокниöн. Эз на тыр вит арöс, кувсис батьыс: медводдза мирöвöй война вылын сюрöм дойясысь нэмыс лоис дженьыд. Дас арöсöн пансис Великöй Отечественнöй война. Вермис велöдчыны сöмын куим класс. Войналöн медводдза гожöмнас нин верстьöкöд тшöтш пуктiс колхозлы турун. Сэнi вердiсны рокöн, а гортас олiсны тшыг нисьö пöтöн. Видзлiсны мöскöс, но сiйöс косявлiс ош. Семьяын быдмысь кык воклы сiдз шусяна иждивенческöй карточка, код вылö позис босьтны сöмын 200 грамм нянь, эз сетны. Пöжавлiсны нянь вартöм бöрын кольöм жуг. Кынöм тырлiс, но пöтöслун эз шедлы. 
Тöвнас нывбабаяскöд тшöтш пöрöдiс вöр, вöлöн ваялiс пес. Вöлi ляпкыдик да сийöсавны эз судз, отсавлiсны верстьö. 
Колхозын уджалiс 1950 воöдз. Во мысти помалiс курсъяс да босьтчис уджавны леспромхозын трактористöн. Пуксьылiс весиг пескöн ломтысьысь КТ-12 вылö. 1954 воын босьтiсны армияö. Веськалiс Архангельск обласьтса Немеихаö. Кöть лыддьысис Беломорскöй флотын служитысьöн, но сiдзжö заптiс вöр. 
Армияысь воöм бöрын бöр пырис уджавны леспромхозö. Сэки Комиö, тшöтш и Кулöмдiн районö, мöдöдлiсны мыжтöг мыждöмъясöс. Найö овлiсны нимтöм посёлокъясын, кодъяс лыдын вöлiны 21-öд километр, 28-öд километр. Василий новлiс сэтчö тракторöн сiдз шусяна щитöвöй керкаяс. 
Кужйысь некытчö эз мун: чужан сиктас кыпöдлiс кык керка. Öнi сэтчöдз вайöдiс ва. 
Гöтырыскöд быдтiсны квайт челядьöс — вит нылöс да öти пиöс. Пиныс быдмис бать-мамлы нимкодясьöм вылö, вöлi зэв зiльöн, Визинын кыпöдiс рöдвуж отсöгöн кык судта керка, пытшкöссö ставнас вöчис ачыс, но нэмыс вöлöма дженьыд. 
Öти ныв олö Визинын жö, мöд Интаын, куимöн Кебанъёльынöсь. Век волывлöны гортас, отсасьöны пöрысьмöм батьлы. 
Арлыд вылö видзöдтöг, Василий Иванович öтырышъя мыйкö вöчö, и векджык ывлаын: то потшсьö, то кыпöдö гожся пусянiн. Зэв дыр яй да чери вöчлiс аслас тшынöданiнын. Сы дорö волывлiсны матö ставöн: кодлыкö тшынöдлiс гос, кодлыкö чери. 
Василий Иванович лыддьö газетъяс, видзöдö телевизор. Но ёна висьöны кокъясыс — кутшöм нö кöм вöлi война кадö да сы бöрын? Ёна кынмавлiс вöрын уджалiгöн. Оз отсавны весиг медся дона мазьяс. Василий Иванович тшöкыда казьтылö война кадö да сы бöрын тшыг олöм: лавкаяс кушöсь, нинöм он вермы ньöбны весиг сьöм вылö. Сиктын эськö вöлi вердчанiн, но Василий мамыскöд волiсны удж вылысь сёрöнкодь, да сэнi вöлi куш нин. 
1947-öд воын Кулöмдiнын кутiсны вузавны коммерческöй нянь. Овлiс, мый мамыс мунлiс öкмыс километра подöн да вайлiс няньсö дзонь мешöк тыр. И сöмын 1950 воын лавка джаджъяс вылын лоис сёян-юан. 
Ольга Маркова. 
Куж. 
Снимок вылын: Василий Иванович Логинов.