Октябр 23 лунö миян районса ыджыд гижысь Вениамин Тимофеевич Чисталёвлöн (Тима Веньлöн) чужан лункöд йитöдын Пожöгын «Тима Веньлöн лолыс кылö» ним улын мунiс кыпыд рыт, кодöс котыртiсны татчöс культура керкаса да библиотекаса уджалысьяс.
Казьтылiсны нималана гижысьöс, лыддисны сылысь кывбуръяс да сьылiсны сылöн кывбуръяс вылö лöсьöдöм сьыланкывъяс, йöз водзö петалiсны Пожöг вожса талунъя гижысьяс — Тима Веньлöн «подув вöрыс».
Рыт вылö волiсны да шуисны кыв гижысьяс Василий Лодыгин да Иван Ногиев, «Парма гор» газетса главнöй редактор Л.Е.Липина, журналист Н.А.Лютоев, овмöдчöминъяскостса библиотекаöн веськöдлысь Г.Е.Пашнина, культура юкöнса юрнуöдысь специалист О.А.Васильева.