Талун — сиктса нывбабаяслöн лун
Сиктса коми аньяс, майбыр, некор эз повлыны уджсьыд, пыр овлiсны тöждöн да могöн, став сьöкыдсö пельпомъяс выланыс босьтöмöн. Со Улыс Вочын чужлöм Надежда Григорьевна Тимушева шöр школа, а сэсся Архангельск обласьтысь Вельскса училище помалöм бöрын 26 во нин уджалö Кулöмдiнын йöлысь вöлöга вöчанiнын. Рысь-нöкйöн да выйöн чöсмасьны ми зэв радейтам, а ёна-ö кокниа либö сьöкыда найö артмöны, сöмын сiйö да сылöн уджъёртъясыс тöдöны. Дерт, кöнкö, уна пöсь на колö кисьтны, медым йöлысь вöчны тайö нуръясянторъяссö. Но Надежда Григорьевна ичöтсяньыс нин велалiс став сьöкыдас: уджын пö и олöмыс — лыддьö сiйö. Да бур, уджыс кö нöшта ловтö кыпöдö. Мый-мый, а аньлöн сьöлöм бурмöдан уджыд тырмымöн. Сiйö олö ас керкаын, ас овмöсöн. Вöдитö ыджыдкодь град йöр, кодi гожöмын ыпъялö уна рöма дзоридзьясöн — синтö вештыны сьöкыд. Öшинювсö гажöдöма , быттьö мойдын. Керкалысь верандасö да пывсян стенсö мичмöдöма уна рöма пробкаясысь вöчöм серпасъясöн, кöнi нюмъялöны кычипи, кöрпи да шондi улын гожйöдчысь юсь. Збыльысь серпасалысь и сöмын. Гортас гöгöр жö гажöдöма ас киöн вöчöмторъясöн. Енбиа мортыд пö быдторйын енбиа. Сiйö öд и кывбуръяс тэчысь. Водзын йöзöдчылiс районса газетын, öнi мыйкö дугöдчис-а. Сиктын олысь мортлы лоö и мужичöй удж бергöдны: коса-курантö ичöтсяньыс нин велалiс кутны, но олöмыс тшöктiс, да ковмис кутчысьны тшöтш пилаö. Гöрбыль ломтыны ваясны, да ачыс пилитö да тэчö. Öнi, дерт, внукъясыс нин быдмыштiсны да кутiсны отсасьны. Надежда Григорьевналöн öд куим челядь, кодъяс олöны ас семьяясöн, да квайт внук-внучка. Налы на вевъялö быдногыс отсасьны. Прöст здук кö сюрас тöлын, лыжи вылö сувтöмöн тöвзьö вöрö, а гожöм-арын — вотчыны. Аскöдыс пыр босьтлö внук-внучкаяссö: мед пö ичöтсянь велöдчасны песны кокнысö, да тöдмöдö найöс, кутшöм пу улын дзебсьöны тшакъяс, а кöнi кисьмöны вотöсъяс. Туйдö уна мукöдторйö: ставыс пö ковмылас олöмас.
Галина Нестерова.