Кольöм вося сентябрын бöрйысьöмъяс дырйи «Опора России» ставроссияса котырлöн Коми регионса юкöн нуöдiс «Веськав «Дасö!» ворсöм. Сылöн мöд тшупöдын, бöрйысян лунö, бöрйысянiнъясö локтысьяслы да кандидатъяс вöсна гöлöсъяс сетысьяслы вичмöдiсны ичöтик календаръяс, кодъясöс сёрöнджык пудйöдiсны Lada Granta машина вылö. Медшуда календар вичмис Улыс Вочысь пенсионер Николай Иванович Морохинлы. Республикаса кар-районъяслы вичмöдöм 21 машинаысь квайтыс местаяс вылö воис сёрмöмöн, тшöтш и миян районö. И со январ 20 лунö ворсöм нуöдысь котырлöн Кулöмдiнса юкöнöн веськöдлысь Р.В.Третьяков вичмöдiс Н.И.Морохинлы машиналысь ключ. Пöся чолöмалiс олöма мортöс ыджыд козинöн и районса администрацияöн веськöдлысь С.В.Рубан.
-Гортсаяскöд важöн нин мöвпалiм ньöбны машина, öд ылi сиктын олiгöн сiйö пыр колö, да козьнавны Николай внуклы, кодi велöдчö Сыктывкарса öтиöд медводдза педколледжын да öти сайын шуис велöдчыны и право вылö.
Гижöд да снимок Галина Нестеровалöн.