Кольöм воын Кекурысь Валентина Леонидовна Мингалёва босьтчис ыджыд уджö: чукöртiс Шахсикт грездысь Великöй Отечественнöй войнавывса фронтöвикъяс йылысь юöръяс. Та бöрын — тылын уджалысьяс да войнакадся челядь йылысь. Валентина Леонидовна ачыс чужлiс да быдмылiс тайö ичöтик грездас. Сэнi öнi олöны бать-мамыс. Кутчысис тайö сьöкыд уджас сы вöсна, мый пыр этшаджыкöн кольöны воддза олысьясöс тöдысьяс. Öнi кö он вöч, лоö сёр, öд кодсюрöлöн эз коль некутшöм рöдвуж. Тайö уджсö бергöдiгöн шахсиктсаяслöн чужис мöвп — котыртны Шахсиктын чужлöм-быдмылöм йöзлысь аддзысьлöм. Сьöлöмсянь кутчысис уджö Агния Михайловна Шахова — Шахсиктын чужлöм морт: звöнитчалiс, шызьöдiс-ыззьöдiс йöзöс, медым воласны чужан сиктö.
И со июнь 18 лунö Шахсиктын чукöртчылiсны матö ставöн, кодъяслöн олöмныс йитчöма Коми мувывса ичöт пельöскöд. Тайö луныс абу грездлöн чужан лун, сiйöс абу пасйöма календарö, но, та вылö видзöдтöг, артмис ыджыд гаж-аддзысьлöм. Сiйö мунiс В.Я.Шаховалöн (Яков Вералöн) овтöм керка дорын. Тулыснас (рöдвужыслысь юасьöмöн) резьöдiсны важ потшöс, весалiсны лöп-ёгысь. Керкаводзса луд вылö айловъяс вöчисны пызанъяс, Пожöгса культура керкаысь вайисны лабичьяс. Керкалöн öти стенмын — вочаалан гижöдъяс, мöдын — ватман вылын важся фотографияяс. Валентина Леонидовна югзьöдлiс паметьсö быдöнлысь, висьталiс, кодi сiйö либö тайö снимок вылын.
Гаж пансис луншöрын, а таöдз М.В.Чисталёвлöн (Яков Вась Мишлöн) керкаын ыджыд экран вылын петкöдлiсны Шахсикт грездысь Великöй Отечественнöй война вылö ветлысьяс, тылын уджалысьяс, войнакадся челядь йылысь чукöртöм-лöсьöдöм юöръяс. Видзöдысь чукöрмис керка тыр, кодсюрöлы ковмис весиг сулавны посводзын. Валентина Леонидовна дженьыдика висьталыштiс экран вылын петкöдлан дзик быд морт йылысь. Кодi эз вöв тöдса — гöгöрвоöдiсны став чукöрöн, кодлöн вужйысь. Сэтшöм нимкодь вöлi йöзлы аддзыны пöрысь ыджыд мам, пöрысь ыджыд бать, пöль-пöч йылысь юöр да фото, казявны, мый тэнад нырыд ли синмыд — кульöма и ляскöма, кыдз шуласны, налысь. Керка тыр ызöбтiс серам, кор аддзисны Ноннi Миколайлысь снимок: мортыс радейтiс юыштны да код юрöн повзьöдлыны челядьöс. Некор некодлы лёк эз вöчлы, сöмын тадзи кикимеритчылiс. Вöлöмкö, и миянлысь батьясöс и мамъясöс, а кодсюрöлысь и внукъяссö, повзьöдлывлöма. А кутшöм мичаöсь вöлöмаöсь пöчьясным, кодъяс снимайтчигкежлö пасьтавлöмаöсь сыръя дора чышъянъяс. «Дзик быттьö артистка», — уна йылысь шуисны видзöдысьяс. Войнакадся челядьлöн снимокъяскöд öттшöтш — налöн казьтылöмъяс.
В.Л.Мингалёва батьыслöн казьтылöмъяс серти дасьтöма зэв ыджыд гижöд Вомын грезд йылысь. Сэтчö бур олöм корсьöм могысь лэччылöмаöсь шахсиктсаяс 1930-öд воясын, а 1960-öдын локтöмаöсь бöр. Сюрöмаöсь Вомынын олан кад йылысь фотографияяс.
Ыджыд козинöн лоис «Юсьöм сикт» дженьыдик кино. Шахсиктын чужлöм-быдмылöм Иван Шахов (öнi асшöр уджалысь) снимайтiс сiйöс республикаса телевидениеын уджалiгöн да петiс вермысьяс лыдö Россияса конкурсын. Кодкö, гашкö, шуас, янöдiс пö чужанiнсö страна пасьта. А менам горшöй гöрддзасис, кор аддзи найöс, кодъяс томöн мунiсны мöдар югыдас вина вöсна. На лыдын — Иванлöн вокыс, кодöс шулiсны Дзоля Коляöн. Сылöн медводдза велöдысь Фаина Калистратовна коркö шулöма: уна во нин пö велöда, а математикаысь татшöм юра зонкасö эг на аддзыв. Либö Дзоля Вова. Мамыс кувсис, кор зонка вöлi потанын. Колис бать да пöрысь пöч вылö. Отсöг вылö воисны ас сиктсаяс. Бура помнита, кыдзи Лия обöкöд волiм на дорö асывнас, обöй гартлiс-пасьтöдiс Воваöс нуны яслиö.
Коля да Вова олiсны олöм, юисны, но некор некодöс некыдз эз дойдлыны, лёксö эз вöчлыны. Гашкö, сöмын пыдзыртлiсны юöмнас мамыслысь сьöлöмсö. Мыйлакö меным найö зэв жальöсь. Чайта да, мукöдыслы сiдзжö.
Дасьтыны ыджыд гижöд, сюйны компьютерö Валентина Леонидовналы отсалiсны Татьяна Павловна Мингалёва моньыс, челядьлысь енби сöвмöдан шöринлöн юкöнöн веськöдлысь Светлана Борисовна Шахова. Зэв ыджыд отсöг вичмис Полина Борисовна Сенькинасянь. Сiйö библиотекар, ачыс Кекурса, но кадöн артасьтöг дасьтiс компьютерöн петкöдлöм вылö снимокъяс да гижöдъяс.
Лун шöрын шахсиктсаяс чукöртчисны Яков Вералöн керка дорö. Валентина Леонидовна гажсö восьтiс Татьяна Шаховалöн (том гижысьяслöн котырö пырысь, быдмис Ярашъюын, бать-мамыс Шахсиктысь) кывбурöн.
Шах ыб бокын, Шах ты дорын
Куткырвидзö миян сикт.
Нёльöд сё нин грездлы тырö.
Муса чужанiн — Шахсикт.

Уна синва война вайис,
Кымын морт сэсь эз и лок —
Кодлöн батьыс, эзысь пиыс,
Дядь и чож да дона вок.

Некор эськö мед эз вунны,
Кодi вайис мир да шуд.
Мичаа му вылас овны,
Олöм эз вöв медым руд.

Аддзысьлам и казьтывлам ми,
Тöдмалам и выль, и важ…
Шуда синва, кыпыд сьылöм.
Сиам лунтыр кежлö гаж!

Öзтам-пестам, тэныд ыстам
Югыд сьыланкыв.
Уджöн-гажöн водзö нимав,
Дона Эжва йыв!
Со мый висьталiс Валентина Леонидовна Шахсикт йылысь:
— Шахсикт. Талун тайö грездыс абу ни öти географическöй карта вылын. Сiйö лоис Пожöг сиктлöн Шахсикт уличаöн. Но танi чужлöм да быдмöм йöзлы сiйö нэм кежлö коляс аслас медся муса грездöн, чужанiнöн.
Ёна жö мичаинö овмöдчылöмаöсь важ йöз. Грездсянь неылын визувтö Эжва, кодi важысянь вердiс чериöн, мышвылас Габшор. Вöр номсöдлiс пöткаöн, тшак-вотöсöн. Ыб вывсянь позьö нимкодясьны ылöдз тыдалан мичлунöн, матiгöгöрын пуксьöм сиктъясöн. Лунвылын тыдалöны Тиман гöралöн юрйывъясыс. Тöвнас ыб вывсянь исласьлiсны даддьöн, лыжиöн, ворйöн да весиг вöв доддьöн. А кутшöм мича Эжва бокса лыа кöсаыс, кодöс шуöны Шоныд лыаöн. Пожöг сиктсöветлöн некутшöм сикт дорын матын абу ты, сöмын Шахсикт дорын Шах ты. Уна во чöж грездсаясöс чöскыд сöдз ваöн юктöдö ключ.
Кыдзи и быд сикт-грездлöн, Шахсиктлöн эм аслас олан туй. Пожöг артмылöма 1676 воын (таво кутас пасйыны 340 во тырöм). Медводдза йöз волöмаöсь Кебраысь, Визинысь, Межадорысь, тшöтш и «Шахов» оваöсь. И.Л.Жеребцов «Где ты живёшь?» книгаын Шахсикт йылысь торйöн нинöм абу пасйöма, сöмын гаралö Пожöг йылысь гижигöн. Стöч юöр, кор артмöма Шахсикт, абу. Буракö, Пожöг артмöм бöрын коркö. Мыйла пуктылöмаöсь нимсö Шахсикт, мыйысь сiйö артмöма? Вермас лоны, Шахов ова йöзлöн сэтчö овмöдчöм бöрын. Ф.Плесовский «Коми овъяс» книгаын гижö Шахов ов йылысь: «Медводдзаысь пасйöма 1646 воын Сыктывса Ыбын. 1678 воын сэн жö — «крестьянин Афонька Андреев сын Шахов, сылöн тыр арлыда пи Васька». 1720 воын Шаховъяс олöны: öти — Елисей Борисович, 79 арöса — Межадорын, мöд — Павел Яковлев сын Шахов вокъясыскöд, племянникъясыскöд да внукъясыскöд — Эжва катыдса Пожöгын. Шаховъяс öнi сöмын Эжва катыдса тайö сиктсöветувса грездъясын.
Шах ним гöгöрвоöдöны оз öти ног. С.В.Веселовский серти шах — чери кыян кулöм («мережка, вентерь с крыльями») кывйысь. Ю.Федосюк серти: персидскöй шах кыв рочын лоöма абу сöмын нимтысьöмöн, но и гортса, мирскöй нимöн».
Миянлы, буракö, лöсялö медводдза гöгöрвоöдöмыс: Шах ты — ты, кытысь кыйлiсны кулöмъясöн чери. Тасянь и артмис, кöнкö, сикт нимыс.
Важ йöзлöн висьталöм серти, грезд медводз вöлöма ыб вылын Дзоля коснöдз юрйылын (öнiя шойналаньын, кытчö гуасьлöмаöсь и водзын, инсö шулöмаöсь Яг ыбöн). Сы вöсна, мый овмöдчылöмаöсь вывтасiнö, öнöдз на шуöны: Вичкодорö (Пожöгö) лэччылам (ыб вывсянь), Кекурö кайлам (сiйö водзын тшöтш вöлöма вывтасiнын, важ вышка дорланьын), а оз Эжвалöн нырвизь серти. Овмöдчылöмаöсь юысь ылö, сы вöсна мый ва кузя ветлöмаöсь йöз вылö усьласьысьяс.
Öнi грезд ыб горулын. Важöн грезд помланьсö шулiсны Ягвылöн. Шахсиктын овлöма купеч Андрей Федотович Шахов, бать овмöссьыс торйöдчöм бöрын мунöма овны Вомынбöжö.
Революция да гражданскöй война юкисны татчöс олысьясöс шöрипельö: öтияс веськалiсны Гöрд Армияö, мöдъяс — еджыдъяс дорö. Шахсиктса коммунист Тристан висьталöм серти, коммунистъясöс еджыдъясысь вичко гöвбöчö дзеблöма поп, а асывнас найö разöдчöмаöсь вöр керкаясö.
Гражданскöй война дырйи Шахсиктса салдат Георгий Деомидович Шаховöс пасйисны Гöрд Знамя орденöн (Комиын татшöм ыджыд пассö сетлöмаöсь сöмын кызь мортлы).
И.Л.Жеребцов серти, 1926 во-ын Шахсикт вöлöма ыджыдджык Пожöгысь: Пожöгын 29 овмöс, 127 олысь (68 айлов, 59 нывбаба), Шахсиктын — 68 овмöс, 277 олысь (135 айлов, 142 нывбаба). 1930 воын грездын вöлöма видз-му овмöс коммуна.
Бур олöм лöсьöдöм могысь шахсиктсаяс 1931-1932 воясын овмöдчылiсны Вомынö. Иван Алексеевич Шахов серамсорöн казьтывлiс та йылысь: кын выйöн пö сыв вый чунявны лэччылiм. Вомынын весиг котыртчывлiс колхоз, но дыр эз кутчысь. 1964 вося тöлын бöръя олысьяс локтiсны сэтысь бöр Пожöгланьö, унаöн овмöдчисны Шахсиктö.
Бур олöм торкис война. Фронт вылö Шахсиктысь мунiс 65 айлов, на пиысь бöрсö локтiсны гортаныс 23-öн, доймалöмöн — кодi кокпöла, кодi синпöла. Эз локны 42-öн: кодкö пуктiс юрсö чорыд косьясын, кодкö вошис юöртöг да туйпомыс öнöдз абу тöдса. Локтысьяс пиысь уналöн югъялiсны морöс выланыс медальяс, кык мортöс, Егор Григорьевич Лужиковöс да Алексей Деомидович Шаховöс, пасйисны Гöрд Звезда орденöн.
Эз вöв эськö Ыджыд вермöм тылын уджалысьястöг. Найö аддзисны вын вежны фронт вылö мунöмъясöс да венны война вояслысь став сьöкыдлунсö. Найö тöдлiсны и шог, и тшыгъялöм. Налы волiсны куим пельöса ичöтик письмöяс, кодъясöс зэв ёна виччысисны. И кынмывлiс сьöлöмныс, кор волiсны руд рöма бумагаторъяс, кöнi вöлi пасйöма: «повтöг усис тышын» либö «вошис юöртöг».
Шахсиктын тылын уджалысьыс, 1930-1931 воясын чужлöмаясöс босьтöмöн, вöлi 115 морт. Талун абу нин ловъя война вылö ни öти ветлысь. Тылын уджалысьыс коли сöмын кык, да и то бокынöсь: Вöльдiнын Анна Алексеевна Шахова (Уляшева) да Скöрöдумын Людмила Михайловна Шахова (Пашнина). Война кадö быдмис 72 морт, Шахсиктын талун олöны öкмысöн: Роза Алексеевна, Раиса Алексеевна, Раиса Викентьевна Третьяковаяс, Леонид Михайлович да Агния Дмитриевна Мартюшевъяс, Лия Алексеевна, Ольга Александровна, Ольга Алексеевна да Анна Андреевна Шаховаяс.
Ёна сьöкыдöн вöлiны войнабöрся вояс. Кыдз-мый вермисны выльысь лöсьöдiсны олöм. Колхоз видзис скöт, пуктiс турун, быдтiс нянь. Вöлi душ-мöд скöт карта, конюшня, лавка.
1959 воын том йöз лöсьöдiсны клуб, кодöс вöчисны кулакавлöм керкаын. Вöчисны 1937-1939 воясын чужлöм йöз (Альберт, Амвросий, Öлексей да с.в.) ас окотасьыныс, некодлöн тшöктытöг да вештысьтöг. Мыйöн да кыдзи вермисны налы отсасисны нывъяс. Эштöдiсны Троича кежлö. Восьса öдзöсöд «Шен», «Шондiбан», «Русскöй» йöктöм-швачкöм кылiс öти сикт помсянь мöдöдз. Мöдар жыръяс вöлi челядьöс видзанiн.
1972 воын рытпуканiн лöсьöдiсны важ косьтысянiнö. Водзмöстчис Татьяна Григорьевна Лужикова, кодi томиник нылöн локтiс уджавны Пожöгса совхозö да овмöдчис Шахсиктö. Гажаа коллявлiсны рытпукъяс, ворслiсны, сьывлiсны-йöктывлiсны. Волывлiсны весиг орчча сиктъясысь. Шахсиктын век кылiс гудöк шы. Гудöкасьысьыд танi век вöлi тырмымöн, а Михаил Тимофеевич Уляшев мичаа ворсiс балалайкаöн.
Грездлöн озырлуныс — танi чужлöм-быдмöм йöз. Найö олiсны и олöны кодъяс орччöн, кодъяс разöдчисны республика пасьта, а кодъяскö и дзик бокынöсь — Украинаын, Узбекистанын, Воронежын, Мурманскын. Шахсиктсаяс зiльöсь, вежавидзысьöсь. Найö абу велалöмаöсь ошйысьны, но быдлунъя шань олöм — томъяслы бур пример. Нимöдны кö найöс удж кузя, позьö казьтыштны став сиктсасö. Коймöд тшупöда Трудöвöй Слава орден сетiсны Раиса Алексеевна Третьяковалы («Пожегодскöй» совхозын лысьтысьысь), Алексей Модестович Шаховлы (Великопольскöй лесопунктын тракторист), Александр Евтихеевич Шаховлы (Великопольскöй лесопунктын вöр пöрöдысь). Трудöвöй Гöрд Знамя да «Знак Почёта» орденъясöн пасйисны Анна Модестовна Шаховаöс (уджавлiс МТС-ын трактористкаöн да лысьтысис «Пожегодскöй» совхозын). Василий Егорович Шаховлы (уджавлiс «Дружба» колхозын) сетлiсны «Знак Почёта» орден, Фаина Николаевна Шаховалы (увйысис Великопольскöй лесопунктын) — «За трудовое отличие» медаль, Нина Гавриловна Третьяковалы (вöлi пасъясьысьöн Великопольскöй лесопунктын) да Михаил Иванович Чисталёвлы (водителялiс Великопольскöй лесопунктын) — «За трудовую доблесть» медаль. Агния Михайловна Шаховаöс (асшöр уджа-лысь) пасйисны «За заслуги в бизнесе» медальöн да «Золотой фонд регионов» орденöн. Анна Степановна Чисталёва — Россия Федерацияысь народнöй образованиеса отличник, Вера Михайловна Зезегова — Россия Федерацияысь пыдди пуктана велöдысь, Нина Михайловна Шахова — Россия Федерацияысь öтувъя образованиеса пыдди пуктана уджалысь. Шахсиктысь петöм 15 мортлöн эм «Уджвывса ветеран» ним.
Грездса олысьяс босьтiсны унапöлöс профессия, уджалiсны и уджалöны матö быд юкöнын. Сиктын медся коланаясöн вöлiны трактористъяс да скöт дорын зiльысьяс, öд совхоз дырйи Шахсиктын вöлi скöтнöй двор да кукань видзан гид, колхоз дырйи нöшта вöлöмаöсь чипанъясöс, ыжъясöс, порсьясöс видзанiнъяс. Скöт дорын зiльысьяслöн ставыс вöлi кипом удж. Уль руа важиник картаясын вöлi кöдзыд, но йöз уджалiсны зiля.
Шахсикт вöлi озыр и трактористъясöн, кодъяс уджавлiсны колхозын, совхозын, ПМК-ын. Айловъяскöд тшöтш нывбабаяс (Людмила Григорьевна да Евдокия Несторовна Лужиковаяс, Нина Григорьевна, Анна Модестовна, Александра Васильевна, Людмила Михайловна Шаховаяс, Анастасия Афанасьевна Сенькина).
Вöлiны и эмöсь сварщикъяс, кузнечьяс, вый вöчан заводын уджалысьяс, бурдöдысьяс, велöдысьяс, садйын, почта вылын, связьын, телевидениеын, энергетика юкöнын, кылöдчанiнын, библиотекаын, вузасян юкöнын уджалысьяс, бухгалтеръяс, вурсьысь-шöрасьысьяс, пусьысь-пöжасьысьяс, стрöитчысьяс, киномеханикъяс, посни челядьöс дöзьöритысьяс да с.в.
Иван Фёдорович Шаховлöн (Матрен Ваньöлöн) абу некутшöм пас. Но сiйö ичöтсянь отсасис мамыслы скöт дорын. Ачыс 16 арöссянь босьтчис уджавны фермаын — тöлын дежуритлiс, гожöмын пастукалiс. Уджалiс зэв кывкутöмöн, öнi пенсия вылын. Бур сьöлöма морт лэдзис овны ас дорас Чисталёвъяслысь семья-сö, кор налöн сотчис керканыс. Öтув олöны öнöдз.
Шахсиктсаяс век олiсны ыджыд семьяясöн. Ольга Тимофеевна Чисталёва да Анна Модестовна Шахова чужтiсны дас челядьöс, Галина Александровна Чисталёва — öкмысöс, Мария Николаевна Шахова — кöкъямысöс, сизим челядяöн быдмисны Роза Алексеевна Третьяковалöн, Анна Семёновна да Ольга Алексеевна, Анастасия Александровна Шаховаяслöн, Анна Корниловна Чисталёвалöн, квайтöн — Анастасия Александровна Шаховалöн, витöн — Наталья Николаевна Напалковалöн, Аксинья Фёдоровна, Мария Дмитриевна, Парасковья Степановна, Анна Афанасьевна, Евстолия Алексеевна Шаховаяслöн, Нонна Александровна да Мария Мохеевна Мингалёваяслöн.
Медся кыпыда грезд овлiс 1970-1990 воясын, кор вöлi удж, чужисны да быдмисны челядь. 1961-öд воын чужлöмаöсь öкмысöн, 1962-öдын — дас кыкöн. Гажаа кольлiс челядьлöн да том йöзлöн прöст кад. Рытъяснас совхозлöн амбаръяс дорын том йöз ворслiсны волейболöн, посниджыкъяс — мачöн, чеччалiсны пöвъяс вылын. Кöжа гу бокын вöлi футболысь ворсанiн. Пемыд арся рытъясö ворслiсны «избегайысь», дзебсьывлiсны сiдзи, мый корсьысьысьяслы мукöддырйи эз сюрлыны. Кор тупкысисны клуб (лоис лавка) да косьтысянiнö вöчлöм рытпуканiн, том йöз кутiсны чукöртчывны Рöдь жытник водзö. Волывлiсны весиг орчча грездъясысь. Тшöкыда кылiсны гудöкасьöм да сьылöм шыяс. Торъя гажа вöлi праздникъяс дырйи.
А кутшöм гажа вöлi гожöмнас видзьяс вылын турун пуктiгöн. Грездысь горулын Эжва бокса видзьяс вылын — Пурга дiын, Ыджыд Кöджын, Каличкинын — асывсянь рытöдз кылiс серам-сёрни. Верстьöкöд öтув уджалiсны и челядь. Звеноöн пуктысьлiсны Вомынын.
Талун Шахсиктын 90 гöгöр морт, на пиысь öкмысöн — челядь. Витöн велöдчöны Пожöгса школаын, нёльöн садйö ветлан арлыдаöсь. Сиктын унджыкыс нин пенсионеръяс. Армияын некод абу, да и матысса воясö оз ло. Карын велöдчö öти морт. Уджалöны квайтöн. Эмöсь на эськö уджалан арлыдаясыс. но… йöз öтарö юсьöны.
Медыджыд мытшöд — абу юан ва. Овлö, мый тöвнас ва позьö босьтны сöмын ключысь, а сэтчöдз ылын. Ва колонка, кодi сулалö грездö пыранiнын, оз уджав.
Олысьялы зэв эз во сьöлöм вылас, мый накöд сёрниттöг-юасьтöг грездысь вöчисны улича. Та бöрын чина йöзлöн тöждыс тöдчымöн чинiс. Грезд воысь воö важмö. Уна овтöм керка, эндö видз-му. Том йöз абуöсь. Бур удж абу, та вöсна кодсюрö ветлöны уджавны бокö. Оз чужны выль семьяяс, этша челядь.
Эмöсь и бурторъяс: уджалö челядьлысь енби сöвмöдан шöринлöн юкöн, кöнi зонпосниöс велöдöны вöчасьны сюмöдысь, пуысь, вурсьыны-вышивайтчыны. Эм вузасянiн, кодöс кутö Шахсиктын чужлöм-быдмылöм Агния Михайловна Шахова.
Шахсикт пыр öнi ветлö Кулöмдiнö лэччывлысь автобус. Йöзлы оз нин ков воддза моз шлапсьöдны Пожöгöдз. Школаса велöдчысьясöс сiдзжö новлöдлö автобус. Эм спутника телевидение, МТС да Мегафон операторъяслöн сотöвöй йитöд, модема интернет.
Öтка пöрысь йöзлы отсасьöны социальнöй уджалысьяс. Ыджыд арлыда йöзлы некымынысь вонас гортаныс волöмöн бурдöдысьяс вöчалöны уколъяс.
Грездсаяс öтув колльöдöны бöръя туйö кулöмаясöс, сöстöма видзöны шойна.
Шахсиктö локтiс овны куим том семья. Кыкыс лöсьöдiсны нин овмöн ас керкаяс, нöшта öти семья лöсьöдö. Налöн эмöсь челядь, сiдзкö, танi олöм оз кус. Мед дыр на олас муса да дона Шахсикт грездным!
Валентина Леонидовна пö-ся аттьöалiс гаж да аддзысьлöм дасьтысьясöс, отсасьысьясöс — Н.М.Москательниковаöс, Л.А.Шаховаöс, Л.М. да А.Д.Мартюшевъясöс, П.Б.Сенькинаöс, Е.А.Уляшеваöс, Е.А.Третьяковаöс, С.Б.Шаховаöс, Е.В.Поповаöс, М.И. да Т.В.Шаховаясöс. Гаж лöсьöдöмын зэв ыджыд пайыс Агния Михайловна Шаховалöн, кодi котыртiс вузасьöм, отсалiс сьöмöн да юмов козинъясöн, а сiдзжö корлiс гажöдны йöзöс Скöрöдумысь «Юрган» ансамбльöс.
Тайö гижöдын, дерт, унаöс эз ло пасйöма. Но аслас сёрниын Валентина Леонидовна казьтыштiс дзик быдöнöс, кодi овлiс Шахсиктын да код йылысь сяммис тöдмавны. Бур кыв сюрис ставлы: енбиаяслы, киподтуя йöзлы, град йöр бура вöдитысьяслы, джодж дöра кыысьяслы да вурсьысьяслы, пач тэчысьяслы, öтлаын уна во олысь гозъяяслы, медся олöмалы да медся томлы. Чöв-лöнь здукöн казьтыштiсны найöс, кодъяс абуöсь нин. Шахсиктсаясöс сiдзжö чолöмалiс «Пожöг» овмöдчöминса юралысь Н.А.Шахова.
А сэсся пансис Шахсиктын вöвлытöм на гаж. Пызанъяс сайö медводз пуксялiсны ас вужъясöн, ас сёян-юанöн, но öдйö ставныс öтлаасисны. Быдöнсянь позис кывны гаж котыртысьясöс аттьöалан кывъяс. Збыль, нуöдöма зэв ыджыд удж, медым чукöртны та мында юöр. Ёна нимкодь вöлi и öнi Шахсиктын олысьяслы, и бокысь чужан сиктö локтысьяслы. Со кыдзи донъя-лiс гажсö А.В.Ильясова: «Ёна жö и бура ставсö мöвпыштöмаöсь да вöчöмаöсь. Шахсикт йылысь висьталiгöн унаысь чепöсйылiс синва, öд бур кывъясöн казьтыштiсны и менсьым бать-мамöс, кодъяс абу нин ловъяöсь, но ловъя на чужан керка, кытчö век локта нимкодьпырысь. А со фотояс вылысь кодсюрööс эг тöд, чайтi öтиöс, вöлöма мöд. Некор оз вушйыны паметьысь челядьдырся да томкадся медшуда вояс, мам-бать дорын красуйтчöм».
Уналысь кывлi: татшöм гажсö пö аслам нэмöн аддза медводдзаысь. Гашкö, сы вöсна, мый Шахсиктын татшöм гажыс зьыльысь медводдза, сiйöн и артмис сэтшöм бура. Важ керкадорса луд вылö «Юрган» котырлöн сьылöм улö петавлiс йöктыны том и пöрысь. Вунлiс, небось, став висьöмыс, кос кочкöмыс да давленньöыс. Кодсюрö эз вермы лэччöдны гортас пöрысь мамсö: кысь пö ме сэсся аддзывла татшöм гажсö, мöдар югыдсьыс али мый?
Мыйла артмис татшöм ыджыд гажыс грездлöн, кодi збыльвылас абу нин? Гашкö, сы вöсна, мый быть колiс казь-тыштны танi коркö овлысьясöс бур кывйöн, казьтыштны ставнысö. Ми, ловъяяс, тшöкыда корам отсöг Енлысь да чужтысьяслысь, воис кад тадзи аттьöавны найöс, и артмис тайö Троица водзын кулöмаясöс казьтылан лунö. Тайö гажыс колiс ставлы, кодi öнi олö бокын: быдöн аддзис, мый чужанiн ловъя, кутчысьö, виччысьö сiйöс. Колiс и танi олысьяслы: Шахсикт — абу овтöм, некодлы ковтöм, а медся радейтана, медся муса чужанiн.
Ме ачым Шахсиктса жö, и мусаджыкыс нинöм абу аслам чужанiнысь. Казьтыштны кö челядьдырöс, тайö — ыб вылысь анькытш вотöм, челядь чукöрöн Дзоля вöрö чöдлач вотны ветлöм, шор бокысь оз вотöм, Шоныд лыа дорö ма кöра видзьяс пыр котралöм, турун пуктöм, ю дорын пожъясьöм, астшöтшъяяскöд рытъяснас ворсöм. Нэм кежлö сьöлöмын — мича-мича вöр-ва, кодöн нимкодясьны он пöтлы. Ме тэнö радейта, менам ичöтик Шахсикт!

Лидия ЛИПИНА.
Гижысьлöн снимокъяс вылын: ;гаж нуöдысьяс; важся снимокъяс видзöдалiгöн; йöктыны петавлiсны и томъяс, и олöмаяс,гаж вылö волысьяс.