Босьтчим чукöртны гижöдъяс, снимокъяс да мукöдтор фронт вылö ветлысьяс, тылын уджалысьяс да войнадырся челядь йылысь.
Фронт вылö мунысьяс йылысь корсянторъяссö чукöртам «Найö кувлытöмöсь» ним улын. Талун кежлö тöдмалiм, мый миян Вöльдiнысь фронт вылö мунiс 199 морт. Война помын локтiсны Ручысь да Удораысь öти фронтöвикöн. 201 пиысь снимок эм 87-лöн, 64-лысь гижöма фронтвывса туйсö. Медуна гижöд да мукöдтор вайисны Вера Николаевна (батьыслысь дневниксö), Елена Владимировна, Елена Николаевна, Елена Васильевна, Мария Ивановна II, Мария Николаевна (ассьыс воддза пасйöдъяссö), Олег Ливериевич Уляшевъяс, Василий Алексеевич Игнатов, Нина Витальевна Лях (мамыслысь пасйöдъяссö). Чукöрмис вель уна документ, фронтвывса 29 письмö, газетъясысь гижöдъяс, фронт вылö ветлысь рöдвужлöн письмöяс да велöдчысьяслöн гижöдъяс, аслам альбомö чукöртöмторъяс да гижöдъяс. Пасъя, мый 29 воинöс абу гижöма республикалöн «Паметь книгаö».
Тылса уджалысьяс йылысь медуна чукöртiсны чоя-вока Михаил Елисеевич да Надежда Елисеевна, Елена Васильевна, Галина Фёдоровна Уляшеваяс да Мария Прокопьевна Игнатова. Унатор дасьтi и ачым.
Войнадырся челядь йылысь ёнакодь тöдмалiм кольöм воын. Лэдзим весиг книга. Став гижöдсö шыльöдi-мольöдi, лэдзöм вылö дасьтi ачым. Казьтылöм йöзыс — ставныс олöмаяс, но ёна отсасисны и томъяс. Медуна печатайтiс да лэдзис гижöдсö и снимоксö библиотекаса уджалысь Ирина Ивановна Уляшева. Ёна зiлисны и школа-садса директор Наталья Александровна Уляшева, сиктса администрацияысь специалист Анна Ивановна Шахова, сэтысь жö бухгалтер Вера Александровна Игнатова, Ягкöдж школаса велöдысь Евгения Ивановна Подорова, культуралöн колледжын велöдчысь Полина Игнатова.
Медым öшöдны-пуктыны став чукöртöмсö, Вöльдiн школа-садйысь торйöдiсны жыр. Сiйöс дасьтöмö медыджыд пай пуктiсны сэнi велöдысьяс Наталья Александровна Уляшева, Надежда Николаевна Кипрушева, Анна Михайловна Игнатова, воспитательяс Виктория Викторовна Уляшева, Юлия Александровна Брагарник, Светлана Владимировна Мингалёва, няняяс Алёна Александровна да Тамара Александровна Уляшеваяс, завхоз Надежда Ливериевна Уляшева.
Май 9 лунö «Кувлытöм полклöн» мунöм да казьтылан пас дiнын чукöртчылöм бöрын ставöн мунiсны школа-садйö, кöнi и восьтiсны фронтöвикъяслы, тылса уджалысьяслы да войнадырся челядьлы сиöм жыр. Фотографияяс вöлiны стенмын, а альбомъяс, письмöяс, удостоверениеяс, усьöм йылысь юöра гижöдъяс да мукöдтор — пызан вылын. Дерт, став чукöртöмторйыс эз тöр, кутам вежлавны, содтавны, выльмöдны.
Висьтала ыджыд аттьö став отсасьысьлы — 140 сайö мортлы. Волöй, видзöдлöй, пасйöй ассьыныд мöвпъяснытö, индöдъяснытö. Пыдди пуктам быдöнлысь и ставныдлысь.
Полина УЛЯШЕВА.
Вöльдiн.