Окота пасйыштны Ручса водзмöстчысь да енбиа йöзöс. Иван Андреевич Попов оз сöмын сьыв да йöкты «Сударушка» котырын, удитö и вöчасьны пуысь, отсасьö ас сиктсаяслы ваявны пес да турун, гöрны, ёртасьö спорткöд. Ставным тöдам Владимир Леонидович Трегубовöс. Ручö вотöдз уджалiс Россия пасьтала, но олöмыслöн визулыс вайис миян сиктö. Танi и аддзис аслыс муса пöвсö Мария Витальевнаöс, кöдкöд öтув сьылöны-гажöдöны йöзöс. А кутшöм чöскыда Владимир Леонидович пöжалö пирöгъяс. Гозъя и спортын век öтлаынöсь. Дмитрий Вениаминович Кирушев велöдчöм бöрас уджавлiс школаын, вöлi крестьянин овмöс кутысьöн, депутатöн, сиктса юралысьöн. Мича сьылö оз сöмын Ручса котыркöд, но и Аныбса аньяскöд. Бура вöчасьö сюмöдысь, радейтö спорт. Тайö айловъясыс пыр петкöдчöны гажъясын, мича сьыланкывъясöн шонтöны миянлысь сьöлöмъяснымöс. Зэв кыпыдöсь, тшöтш и йöктöны сцена вылын.
Сьöкыд кад, кытчö сэсся сиктад мунан кыпöдны ловтö, дерт, культура керкаö, кöнi быдöнлы радöсь. Пыр пöся вочаалö да миянöс ышöдö Надежда Михайловна Подюкова. Öтув и гаж пуктам, и спортöн занимайтчам, волам песны кок тренажёръяс вылö, и походъясö ветлам. Öтувъялунöн «Олимпик» ёнмöдчанiнын «Здоровым быть здорово» пас улын «Весёлые старты» дырйи босьтiм медводдза места. Сэнi петкöдчис став сьылысьыс. Кор эмöсь татшöм водзмöстчысь йöзыс, ме чайта да, Ручын олöм оз кус некор.
Екатерина Ульнырова.
Руч.