Медводз пиыс, а сэсся сёрнитiгкосттi батьыс, экскаваторöн машиналöн кузовö зэв сюся сöвтiсны лыа. Батьыс ыджыд кöшнас отсыштiс-йöткыштiс на вöрзьöдчыны-петны ыджыд машиналы. Тадзи öта-мöдсö вежлалöмöн экскаватор да погрузчик вылын зiльöны батя-пиа. Александр Петрович Тимушев туй овмöсын 47 во нин, Александр пиыс 16 арöссянь. Армия бöрас весиг эз шойччы, пыр жö локтіс уджавны. Эскöны, мый и Николай локтас армияысь да тшöтш сюртчас на дiнö.

– Туй вöчан да дзоньталан Кулöмдiнса юкöнын 1978–öд восянь, кöть эськö Кебанъёльса училищеын велöдчи катерöн веськöдлысьö. Школа бöрын кад кежлö босьтлiсны туйяс дзоньталiгöн-вöчалiгöн, а сэсся армия бöрын ышöдiс Анатолий вокöй, кодi уджалiс танi жö. Тасянь ыстывлiсны велöдчыны экскаваторщикö. Локтi да медводз во джын вöлi экскаваторöн веськöдлысьлы отсасьысьöн, а сэсся пукси ачым нин. Буретш сэки вöчисны Сыктывкарлань асфальта выль туй, ми уджалiм туйвежсянь Куж весьтöдз, – том кадас бергöдчылiс Александр Петрович, кодöс уна вося бур уджысь унаысь пасйылісны почёт грамотаöн.

Сэсся вуджлiс Донö, кöнi уджалiс туй овмöс мöд предприятие нин. Асфальт вольсалiсны сиктын, Донсянь Кулöмдiнöдз. Нёль во мысти бöр локтiс туй вöчан да дзоньталан Кулöмдiнса юкöнö. Асфальта выль туй юкöн вöчисны Носимсянь Дереваннöйöдз. Водзті пö, кор вöртö кылöдлісны, эз сэтшöма жугласьлыны туйясыд. Öні пö вöчöны бур асфальт, но тшыкöдöны вöр тыра сьöкыд машинаяс.

Александр пиöй пö кабинаын и быдмис. И уджалігöн, и техника дзоньталігöн пыр батьыскöд орччöн. 16 арöссянь зілис рабочöйöн асфальт вöчанінын. Нажöвитöм сьöм вылас Сыктывкарса автомеханическöй техникумын велöдчис экскаваторöн веськöдлысьö. Сöвтчан техникаöн веськöдлысьö велöдчыны курсъяс вылö ыстылісны удж вывсянь нин. 2019–öдсянь кольöм воöдз уджаліс погрузчик вылын, сэсся экскаваторöн. Зілис юрсиктлöн выль юкöнын Стрöительяс, Лодыгин, Петропавловскöй да мукöд уличьяс вылын, а сідзжö полициялöн керкасянь аэропортö каян туйöдз кытшола туй вöчигöн.

Водзті кö Александр Петрович туйдіс-велöдіс писö, öні мöдарö, Александр батьсö. Олöм мунö, техника выльмö. Гожöмын кö дзоньталöны-вöчöны туйяс, тöлын весалöны лымйысь, вильдöмысь резöны лыаöн. Ыджыд сяма уджалысь пасйис, мортыдлы пö быд лун кыдз нянь, сідз и туйыд колö.
Марина Дадашова.
Снимок гижысьлöн.