Помöсдiнса шöр школаысь велöдысь Галина Ивановна Максимовалы таво сетiсны «Республикаса пыдди пуктана велöдысь» ним. 
— Уна йöз водзын нимöдiс республикаса юралысь С.Гапликов. Вöлi зэв нимкодь. Быттьö öнiöдз на шемöсын, — висьтасис Галина Ивановна. 
Нывбаба быдмис Кебанъёльын. Батьыс 13 во сэнi велöдiс труд. Нывка дзолядырсяньыс кöсйис лоны велöдысьöн. Помалiс Коми пединститутлысь география да биология кузя факультет. Мöдöдiсны уджавны Помöсдiнö и со 30 во танi. Век классöн веськöдлысь. Велöдö сьöлöмсянь, челядькöд тшöкыда петавлö вöр-ваö, пыр тöдмöдö мичаинъясöн, школаын велöдöмсö петкöдлö ывла вылысь. 
Галина Ивановналöн петасъяс пиысь унаöн велöдчöны врачö, вöр-ва видзысьö. Сiдзкö, велöдöмыс йиджö томъяслöн сьöлöмö. 
Нывбаба верöс сайын. Сiйö Дереваннöйса, тöдмасьлiсны велöдчигöн на. Гозъялöн кык челядь, ыджыдöсь нин. Нылыс уджалö велöдан управлениеын, а пиыс вöр-ва видзысь. Эм кык внучка. Олöны Сыктывкарын. 
Галина Ивановна радейтö ветлыны вöрö. Век аскöдыс фотоаппарат да корсьö аслыспöлöсторъяс. Сьöлöмсянь бергöдчö град йöрын. 
— Меным долыд, мый уджала бур школаын, кöнi пыр отсалöны уджвывса ёртъяс, — эз дзеб нимкодьлунсö Г.И.Максимова. 
Галина КЛЮЖЕВА. 
Снимок интернетысь.