Кристина Юрьевна Апостолиди зэв бура тöдса районса олысьяслы. Котыртiс да нуöдiс уна гаж, конкурс да фестиваль. 2002 воын Сыктывкарын культура колледж помалöм бöрын веськöдлiс районса культура керкалöн челядькöд уджалан юкöнöн, пуктывлiсны ворсöмъяс, петкöдчывлiсны гажъяс вылын. 2006 восянь веськöдлiс культура юкöнлöн организационно-методическöй шöринöн, сетiс удж кузя отсöг районса культура учреждениеяслы. Уджалiгмоз помалiс культуралысь да искусстволысь Санкт-Петербургса университет.
Тавося январ помсянь Кристина Юрьевна веськöдлö районса культура керкаöн. Сылöн уджалан котырын 20 морт, на пиысь 10-ыс творческöй уджалысьяс, кодъяс велöдöны йöктыны, сьывны, кысыны челядьöс и верстьööс. Апрельсянь культура керкалöн бердын лоас и организационно-методическöй шöрин.
— Вужвыйöн дзоньталöм бöрын районса культура керкалöн вежсис чужöмбан. Кыпыдöн да югыдöн лоис видзöдысьяслöн зал. Мичмöдiсны сцена выв, видзöдысьяслы лöсьöдiсны выль пуклöсъяс, звукооператоръяслы вöчисны торъя жыр да с.в. Кыпыджыка кутасны мунны гажъяс, оз ло яндзим гöсьтъясысь. Чолöмала культураса уджалысьясöс асланыс праздникöн! Сиа став бурсö, ён дзоньвидзалун, югыд енбиа кузь нэм, шуд да семьяясын судзсяна олöм, — висьталiс К.Ю.Апостолиди.