Тöдмасисны связьлöн Архангельскса колледжын электромеханикö велöдчигöн. Воисны öта-мöдлы сьöлöм выланыс, 1995 воын локтiсны Кулöмдiнö да лöсьöдiсны семья. Сiйö жö восянь Сергей Александрович босьтчис уджавны связьын, а гöтырыс велöдчöмсö помалiс челядькöд пукалiгмоз да кутiс уджавны связьын 2002 восянь. Сiйö босьтö йöзсянь шыöдчöмъяс, видзöдö, став абонентлöн-ö лючки-бур йитöд, кутö йитöд монтёръяскöд, кодъяс эрдöдöны да бырöдöны орöминъяс. Сергей Александрович велöдчис содтöд да öнi электросвязьса инженер, могмöдö районса АТС-ясöс, ыджыд пай пуктiс найöс цифрöвöй вылö вуджöдöмö.
— Зэв бур специалист, миян котырын татшöмыс лыда, — ошкис сiйöс «Ростелеком» Коми филиаллöн Кулöмдiнса юкöнöн веськöдлысь Т.В.Тимошина. — Шойччан лунъясö кöть отпускалiгас колiгöн пыр чукöстам сiйöс. Ёна пыртам выльторъяс, Сергей Александрович ачыс корсьысьö, велöдчö, вевъялö вöчны став коланасö.
Сылысь бур уджсö пасйисны аттьöалан гижöдöн да почёт грамотаöн. Гозъя öта-мöд вöснаыс ыджыд тöждаöсь удж выланыс и гортаныс. Кыпöдлiсны выль оланiн, кöнi дзользьöны нёль челядь — налöн озырлун. Вöдитöны ыджыд град йöр. Светлана Александровналысь сьöлöмсö медся ёна кыпöдö бумагаысь, капронысь да мукöдторйысь вöчасьöм. Артмöмторъяссö козьналö матыссаясыслы да тöдсаясыслы.
Гижöд да снимок Галина НЕСТЕРОВАЛÖН.