Ковмас пуктыны быть
Колö ёнджыка уджавны йöзкöд да гöгöрвоöдны найöс, мый колö быть пуктавны коммунальнöй могмöс арталан öтувъя приборъяс.
Татшöм мог сувтöдiс республикаса юралысьöс вежысь Константин Ромаданов регионса исполнительнöй власьтлöн тайö юкöн вöсна кывкутысьяс водзын. Паськыдджыка юöртны та йылысь йöзлы, веськöдлан котыръяслы, ресурсъясöн могмöдан организацияяслы индöма архитектура, стрöитчöм да коммунальнöй овмöс кузя республикаса министерстволы, тарифъяс кузя республикаса службалы да оланiн кузя государственнöй инспекциялы.
Кыдзи пасйисны воддза чукöртчылöм вылын, кöнi сёрни мунiс уна патераа керкаясын коммунальнöй могмöс арталан öтувъя приборъяс пукталöм кузя, счётчикъяс пукталöм сетö олысьяслы позянлун стöча тöдны, уна-ö найö видзисны би, ва, шоныд, да мынтысьны сöмын видзöмасьыс. Нöшта видзтö сьöм, бура кö дöзьöритöны öтувъя оланiнлысь эмбур, шуам, оз виявны ва трубаяс, поньталöма шоныд сетан трубаяс.
«Йöзлы, веськöдлан котыръяслы, би, ва, шоныд сетысь организацияяслы колö гöгöрвоны, мый арталан öтувъя приборъяс уна патераа керкаясö ковмас пуктыны быть. Колö уджавны öтув, сэки чинас коммунальнöй могмöсъясысь дон», — пасйис республикаса юралысьöс вежысь К.Ромаданов.
Архитектура, стрöитчан, коммунальнöй овмöс кузя республикаса министерство юöртiс, мый март 1 лун кежлö шоныд арталан öтувъя счётчик сувтöдöма уна патераа керкаяслöн 19 процентын, кöдзыд ва арталан ― 40 процентын, пöсь ва арталан ― 30 да би арталан 20 процентын.
Коми республикаса юралысьлöн
да правительстволöн пресс-служба.