Ляті – сьöкыд висьöм

Март 25-öд лунö чукöртчыліс вуджан висьöмъяслы паныд сулалысь районса комиссия. Сёрнитісны ляті (корь) висьöм йылысь, коді бöръя кадö кутіс паськавны Европаын, паныдасьлö Украинаын, висялöны и Россияын. Коми республикаса медшöр санитарнöй врачлöн индöдöн, быд районлы колö видзöдлыны, кымын мортлы öтисянь 18 арöсöдз абу вöчöма тайö висьöмлы паныд прививка, абу нуöдöма ревакцинация, да вöчöдны быть. Ляті висьöмысь прививка медводдзаысь вöчöны арöсöн, мöдысьсö квайтöн. Босьтасны тöдвылö и найöс, кодъяслы прививка вöчлісны сöмын öтчыдысь да кодъяслöн абу вакцина сюйöм йылысь юöр. Быть ковмас вöчны прививка 35-55 арöсаяслы, найö кö уджалöны велöдан, бурдöдан, вузасян, йöзöс новлöдлан юкöнъясын. Уджалысь верстьö йöз вöсна кывкутöны веськöдлысьяс: роспотребнадзор видлалас уджалан котыръяс да индас вештыны удж вылысь найöс, кодъяслöн оз ло вöчöма лятіысь прививка. 

Читать далее

Öтув кутчысьöмöн

Вöралысьяслöн «Помöсдiн» котыр лöсьöдöмсянь 25 во тырöмлы сиöмöн, тавося март 31-öд лунö Эжва вылын нефтебаза весьтын мунiс йи улысь чери кыйöм кузя ордйысьöм. Сiйöс нуöдiсны öтув вöралысьяслöн котыр да овмöдчöминса администрация. Чöвтлiсны вугырнысö 56-öн, на лыдын 14 арöсöдз 11 челядь да 7 нывбаба. Таысь кындзи вöралысьяс котыртлiсны сяръясьöм да ассьыныс ворсöм, а овмöдчöминса администрация — пневматикаа винтовкаысь лыйсьöм. 

Читать далее

Олöм пуö дзулькйöн

Ручса олöма йöзлöн котырлы март лоис озырöн уна важ да выль тöдсаяскöд аддзысьлöмъясöн, юр жуглан ворсöмöн, спортса ордйысьöмъясöн. Сiдз, ворсiм юрсиктса «Олимпикын» пионерболысь. Вöлi дас вермасьыс котыр – Кулöмдінысь кык, Ручысь, Донысь, Керчомъяысь, Діасёръяысь, Кебанъёльысь, Шöръягысь, Вöльдінысь да Парчысь. Ордйысим öкмыс час асывсянь сизим час рытöдз. Ми, ручсаяс, пукалім да «висим» став вöснаыс. Медводзын лоис Дон, босьтіс зарни медальяс. Ми лоим мöдöн, вöльдінсаяс коймöдöн. Матынджык кö вöлі енэжыс, эськö юрнаным сэтчö люкасим, сэтшöма чеччалім нимкодьнымла. Котырын вöліны Л.И.Кирушева, В.Д.Зезегова, М.В.Расова, М.Д.Юдина, А.И.Шахова, А.И.Адамова, З.М.Гуляева да ме. Котыръяслöн ворсігкості позис сёйыштны вердчанiнын, шырсьыны дон вештытöг. 

Читать далее

Сьöлöмнас том

Мен чайтсьö, мый водзтi йöз вöліны ёна мичаöсь. Со босьтам Ручысь Галина Васильевна Юдинаöс, коді вуджис нин 80 арöс, а чужöм вылас, туша-мыгöрнас, мича гöлöснас, небыд кывъяснас — том морт, да и ставыс. Кор пыравла Галина Васильевна дорö (олö Леонид пи дорас), пыр и кутас кыскавны ыджыд пачысь чöскыд пöсь шыд, пражитöм картупель либö рок. Лэптас чай дорö чöскыдторъяс да пуксяс тэныд воча, быттьö сы дорö локтіс медся дона морт. 

Читать далее

Миян йöз

— Туясьысьяс кö воöны гортас дас час рытын, тайö водз на. Воис кö дежуритан юкöнö лоöмтор йылысь юöр, петам туйö лунын кöть войын, — висьталiс туясьысь Нурби Нуралиевич Напшев. Том морт помалiс Москваса государственнöй юридическöй университет да лоис юристöн. Велöдчигöн тöдмасис да видлiс уджалан сям мыж вöчысьясöс да мыж вöчöм корсян да туялан юкöнъясын, лоис окота уджавны тайö туйвизьын. Уджавтöдз ветлiс армияö, служитiс Москва дорса Балашихаын Ф.Э.Дзержинский нима торъя могъяса дивизияын, кодi видзö лöнь олöм да петкöдчö Победалы сиöм парадын. Сiйö восьлалiс жö Гöрд эрд вывтi, пасйисны медальöн. Бергöдчис районö, кöнi быдмис да велöдчис, кöнi виччысисны бать-мамыс. Вöлi участокса уполномоченнöйöн, во сайын вуджис туясян юкöнö. Туйдiс да велöдiс юкöнса начальник Елена Михайловна Рабканова. Медводдза туясьöмыс — керкаö пырöмöн сьöм гусясьысьöс корсьöм. Кузь киаöс «тшапкисны» суткиöн. Öтчыд öти овмöдчöминса морт юöртiс 112 службаö, мый администрациялöн керкаö пуктiс пасьвартантор. Пыр жö петiсны туйö став юкöнöн. Ветлiс весиг пытшкöсса делöяслöн юкöнса начальник. Корисны и МЧС-öс да «тэрыб отсöг сетан» юкöнöс. Корсьысисны да нинöм эз сюр. Код юра мортöс корсьны эз ков, сiйö вöлi гортас. Кöсйöма видзöдлыны, öдйö-ö локтасны. «Шмонитöмысь» мыждiсны чорыда. 

Читать далее

Свежий выпуск: за 18 апреля