Сиктса юралысь дорö матö быд лун олысьяс волöны-шыöдчöны быд сикас юалöм-вöзйöмöн. Найöс кывзöмöн да корöмъяссö тöд вылö босьтöмöн и артмö öтув збыльмöдны мöвпъяс, бурмöдны ас сиктын олöм, мичмöдны сылысь чужöмбансö, гажöдчыны, ышöдны челядьöс бурö, радейтны вöр-ва, пырöдчыны спортö да бергöдны мукöд удж.

 Анатолий Васильевич Пименов, Немдiнса юралысь, буретш татшöм мортöн петкöдчö сиктсаяслы.
Чужис Аныбын. Кык арöсын бать-мамыс вуджисны овны Немдiнö. Сэнi и быдмис, колис челядьдырыс.

— Школа бöрын мунi велöдчыны Кировса видз-му овмöс техникумö. Орöдчылi велöдчöмысь да ветлi армияö. Служитi Санкт-Петербург бердса Кронштадт карын Войвыв саридзса флотын ракета лыйлан катер вылын электрик-мотористöн. Гортö локтi старшинаöн. Бöр пыри техникумö да босьтi техник-электриклысь специальносьт, — том кадö бергöдчылiс Анатолий Васильевич.

 Том морт бергöдчис Немдiнö да пырис уджавны лунвыв электрическöй сетьяслöн районса юкöнö. Уджысь орöдчывтöг велöдчис Сыктывкарса вöр институтын инженер-электрикö. Электромонтёрöн зiлис öкмыс во. Гöтрасис Светлана Витальевнакöд. Гозъялöн чужисны пи да ныв. Кирилл петiс нин ас олöмö, Юлия велöдчö сизимöд классын. Ичöтсянь радейтiс вотчыны, кыйсис-вöралiс, и öнi на тшöкыда петавлö вöр-ваö.

 Ас кадö Анатолий Васильевичöс бöрйылiсны сиктса депутатöн. Сэки и Немдiнса юралысь Иван Леонтьевич Игнатов шойччöг вылö петтöдзыс вöзйис видлыны вынъяс юралысьлöн уджын. Эз бöрыньт, сикт да сэнi олысьяслöн тöжд-могъясöн олö-уджалö 16 во нин.

 — Быд во пырöдчам «Народный бюджет в школе» балаö, тайö отсалö бурмöдны велöдöм, школаса олöм, медым челядь тöдöмлунъяс босьтiсны окотапырысь. Шуам, восьтiм «Шаг в будущее» школаса телевидение, «Сохраним историю вместе» ас му туялан музей, «Зöридз» ансамбль, «Молния» театр. Таво тайö жö бала серти восьтам «Патриоты своей страны» клуб. Анатолий Васильевич отсалö быд босьтчöмын, пыр мунö воча. Сиктын пыдди пуктана морт, — сёрнитiс Р.Г.Карманов нима школаса директор Нина Ивановна Уляшева.
Татьяна Чувьюрова.
Снимок Анатолий Пименовлöн.