Республикаын йöзкост творчество да квалификация кыпöдан шöринлöн юöртöм серти январь 13-öд лунö районса культура керкалöн сцена вылын 29-ысь мунас öнiя коми сьыланкывлöн «Василей» фестиваль. Таво нёль нимпасын — «Чужан му йылысь», «Радейтчöм йылысь», «Серамбана сьыланкыв» да «Том йöзлы сьыланкыв» — юргас 15 сьыланкыв. Гажсö дасьтыны районса администрацияысь культура да национальнöй политика управлениелöн корöм серти кутас Сысола районысь Вера Зиновьева. Сiйö веськöдлö Сысола районысь челядьлöн «Dance avenue» эстрада йöктан котырöн, вöлi режиссёрöн том войтырлöн «Кöйдыс» этнофольклорнöй да «Гажа валяй» йöзкост обрядъяса фестивальяслöн. Вера Зиновьеваöн лöсьöдöм «Сысолалöн сьыланног» обрядъясöн гажа петкöдчöм сигöртiс юркарын Сысола районлысь лунъяс.

Пасъям, мый мöд во юбилейяс пасйöны «Василей» думыштысьяс — Коми республикаса заслуженнöй уджалысь Василий Гущинлы тырö 70 да Коми республикаса заслуженнöй уджалысь да народнöй поэт Василий Лодыгинлы 75 арöс.
Ольга Андреева.