Альбина Григорьевна Попова – олöмаясöс дöзьöритöмын отсасьысь. Вермытöмъяскöд тайö уджыс сылы, позьö шуны, тöдса важöнсянь нин. Ачыс сійö Югыдъягысь. Öкмысöд класс помалöм бöрын, артмис сідз, мый пырис уджавны ветеранъяслöн да вермытöмъяслöн сэтчöс керкаö. Бергöдіс сэні быд удж, мый индылісны – мыськис тасьті-пань, санитаркааліс, пелькöдчис да дöзьöритіс-могмöдіс пöрысь йöзöс. Куим во сэні зільöмöн лючки велаліс тöждысьны на вöсна, гöгöрвоны найöс, налысь майшасьöмъяссö да сьöлöм дойсö, ышöдны найöс бур вылö. Сылöн тöдса ань вöлі социальнöй уджалысьöн да петіс кузь отпускö. Сэк кості Альбина Григорьевна вежис сійöс матö куим во. Отсасис олöма йöзлы гортаныс ветлöмöн, налöн корöм серти вöчис ставсö, эз бара повзьы сьöкыд уджысь, öд ковмыліс пес-ва пыртлыны и пелькöдчыны, лавкаö ветлыны и öткымынъяслы тшöтш и йöрын ноксьыны.

Но сэсся верöсыс том аньöс вайöдіс овны чужан сиктас, Кулöмдінö. Уджыштіс медводз йöзöс социальнöя доръян шöринын пелькöдчысьöн, а сэсся коралісны социальнöй уджалысьö, пыр жö муніс воча. И со кöкъямысöд во нин тані дöзьöритö пöрысь, вермытöм йöзöс. Талун сылöн тöжд улын кöкъямыс морт. Нöшта на куимöс босьтіс уджъёртыслысь, кодöс вежö висиг костіыс.

– Уджыс абу сэтшöм и сьöкыд, сöмын олöмаясыд быдöн аслыспöлöсöсь, колö кужны сибöдчынылöсьöдчыны на дорö, – пасйис Альбина Григорьевна. – Отсöгысь кындзи медшöрыс налы колö вниманньö, сёрнитны сьöлöмсяньыс, мед кокньöдны ловнысö. Мый-мый, а найö радейтöны варгыштнытö, колö сöмын кужны кывзыны. Юрсиктад тані менам олöма йöзлöн быдöнлöн ваыс локтö гортöдзныс, ваявны оз ков. Колö сöмын пес пыртлыны, пелькöдчыны, нуръясянторла ветлыны лавкаö, лекарствола аптекаö да с.в. Ставныс дорö быд лун ветлыны оз ков, позьö лункост мысьт, öтияс дорö öти лунö, мöдъяс дорö мöд лунö вежласьöмöн. Но öти пöчö дорö бытьысь ветла быд лун, медым ас кадö сетавны лекарствояс.

Артмö, ань тöждысьö олöмаяслöн оз сöмын тыр-бур олöм, но и налöн дзоньвидзалун вöсна. Аддзö кö, кор на пиысь кодкö кылö асьсö лёка, пыр жö корö врачöс. Виччысьö, кор волас сійö да видлалас, гижас лекарство вылö рецепт, пыр жö котöртлас аптекаö да босьтчас юктöдны.

Альбина Григорьевна пасйис, мый öні гожöмын ёна кокниджык, олöмаяс дорö позьö ветлöдлыны ас техникаöн – велосипедöн. Кулöмдін ыджыд, а найö олöны öта-мöдсьыс ыджыд костöн. Быть кыдзкö воöдчы, вермытöм йöзыс öд виччысьöны сійöс. Дасьöсь вочаавны кöть быд лун, да оз сöмын отсалöм ради, а сыысь, мый аслас авъя нюмнас да небыд сёрнинас налöн керкаö вайö кыпыдлун.
Галина Нестерова.
Снимок гижысьлöн.