Коми йöз шулöмаöсь: «Дыша кö он ов, лоас нянь и сов». Татшöм кывъяс лöсялöны Смолянкаысь Иванов гозъялы. Нина Егоровна – ас вылö уджалысь. Верöсыскöд кутöны вузасянiнъяс да Югыдъяг вожысь йöзöс автобусöн новлöдлöны Кулöмдiнöдз да Сыктывкарöдз. Ань важöн нин мöвпалiс лöсьöдны нянь пöжаланiн. Коркö ань вузасис ичöтик стрöйбаын, сэсся юкис кык пельö да мöдарас лöсьöдiс пöжасянiн. 2008-öд восянь пöжалiсны нянь. Уджавлiсны Елена Пащенкова, Ольга Ляшенко, Тамара Дубровская. Налöн артмылiсны зэв чöскыд нянь тупöсьяс. Ёна ньöбалiсны да, колiс пöжавны унджык, паськöдыштны уджаланiнсö. 2011-öд воын Нина Иванова шуис лэптыны выльöс. Тайö каднас уджалысьяс вежласьлiсны, но няньлöн кöрыс пыр колис сэтшöм жö чöскыдöн. Ньöбасьысьяслы сьöлöм выланыс воöны и шаньга, черинянь да мукöд пöжас. Вöскресенньö кындзи уджалöны быд лун. Öтчыд пöжалöмнас петö 72 тупöсь. Иванов гозъя могмöдöны няньöн сад да школа, Нина Егоровналöн лавка эм и Парчын, кöнi тшöтш вузалöны ас пöжассö. Таво пöжасянiн дорö вöчисны выль пес видзанiн.
Смолянкаса няньла волывлöны мукöд сикт-грездъясысь. Кор ме ветла гöсьтитны воча чой дорö, век ньöба чöскыд няньсö некымын тупöсь. Гортын разöда став матыссалы.
Нина Егоровналы пыр отсасьö Виктор Михайлович верöсыс. Сиам гозъялы крепыд дзоньвидзалун, водзö овны йöз вöсна тöждöн да ыджыд вермöмъяс.
Артур Гарнов.
Надежда Есевалöн снимок вылын Евгения Миллер да Наталья Ляшенко.