Октябр заводитчигöн Джеджимын, народнöй гижысь, журналист Виктор Егорович Напалковлöн чужанінын, юргис лыддьысьны радейтысьяслöн «Чужан сиктыд – кага потан» фестиваль. Котыртіс да нуöдіс сiйöс Коми республикаса национальнöй политика министерство отсöгöн Кулöмдін районса овмöдчöминъяслöн библиотека. 
Гаж вылö воысьясöс медводз тöдмöдісны Джеджимса музей-библиотекалöн йöрöн. Экскурсия сиисны Виктор Напалковлöн творчестволы: коліс тöдмавны гижысьлысь кывбуръяс, мый вылö овмöсын ковмывліс сійö либö тайö важ эмбурыс, кутшöм обычайяс пуктывлісны пыдди коми кыйсьысьяс да мукöдтор. Йöрöд кытшлалігöн гöсьтъяс тöдмасисны В.Е.Напалковлöн «Эзысь перна» романысь шöр герой Ульянакöд, а сэсся кывзісны поэтöн гижöм частушкаяс, кодъясöс сьыліс «Джеджимса аньяс» котыр. Та бöрын воысьяслы петкöдлісны библиотека-музейö чукöртöм экспонатъяс, велöдісны кыны джодждöра, вöнь, вöчавны лёкторйысь видзанторъяс. Гöсьтъяс тöдмасисны Виктор Егорович да сылöн гöтыр Наталья Васильевналöн творчествоöн. 
Н.В.Напалкова 1997-öд восянь пырö Россияса журналистъяслöн котырö, гижöдъясыс петöны Наталья Дубская псевдоним улын. Сійö йöзöдіс мыжтöг мыждöм украинечьяс йылысь вит книга, «Исповедь» роман-хроника. Романын гижöма 945-öд восянь да водзö босьтöмöн збыль вöвлöмторъяс йылысь. «Украинечьяс Коми Республикаын» книгаö пыртіс Сöветскöй Союзса Геройяслысь, Социалистическöй Уджвывса Геройяслысь, Россияса Геройяслысь, учёнöйяслысь, гижысьяслысь, политикъяслысь да прöстöй бур йöзлысь украинечьяслысь — нимъяс. Наталья Васильевна вуджöдіс роч кыв вылö Виктор Егорович Напалковлысь «Ме тіянöс радейта», «Прöстит, Аньтусь», «Найö миян пöвстын» книгаяс. 
Таво Наталья Васильевна Напалковалы сетісны Коми республикаса Заслуженнöй уджалысьлысь ним. 
Фестиваль вылын сідзжö нимöдісны Виктор Егорович Напалковлысь «Олöмысь лист бокъяс» выль книга. Сійö зэв аслыспöлöс, позьö шуны, татшöмсямаыс миян республикаын лэдзöма медводдзаысь. Сэтчö пыртöма 1987-öд восянь босьтöмöн В.Е.Напалковöн гижöм став донъялана статьясö, кодъяс коркö петавлісны республикаса газетъясын. Матö став статьяыс сиöма коми литературалы да коми кыв сöвмöдöмлы. 
Фестивальлысь öти юкöн сиисны Победасянь 75 во тырöмлы: петкöдлісны В.Е.Напалковлöн «Войнабöрса» кывбур серти лöсьöдöм видео-презентация. Сэнi висьтавсьö война кадö дöваöн кольöм Джеджимса аньяслöн война бöрын сьöкыд олöм йылысь. Наталья Васильевна лыддис Виктор Егоровичлысь Великöй Отечественнöй войналы сиöм кывбуръяс, война йылысь жö сьыліс «Джеджимса аньяс» котыр. 
Лидия Липина. 
Снимок 
Андрей Стрельниковлöн.