Сиктын олысьяслы
«Ыджыд öда интернет» федерацияса программа серти ыджыд удж бергöдiс «Ростелеком» Коми филиаллöн Кулöмдiнса юкöн. Кольöм воын оптико-волокноа йитöд нюжöдiсны нин Дзолльöдз, Белоборскöдз, Вылыс Вочöдз. Районын медводз вайöдiсны социальнöй тöдчанлуна керкаясö: овмöдчöминса администрацияясö, фельдшерско-акушерскöй пунктъясö, школаясö да кусöдчан часьтъясö. Талун кежлö абуöсь нин сиктъяс костын сынöдтi да ыргöн кабеля визьяс. Тайö уджъяссö кутасны нуöдны водзö на.
Паспомын, Кужбаын, Донын, Кекурын, Лопъювадын, Озъягын, Ярашъюын, Скöрöдумын, Пожöгын, Вöльдiнын, Ягкöджын, Выльгортын, Пузлаын, Пожöгдiнын, Носимын, Дiасёръяын, Мысын, Лöгинъягын сюръяяс вылö пуктiсны Wi-Fi оборудование, кöть радиусыс абу ыджыд, но позьö пыр пырны интернетö. Урчитiсны медводз татшöмсö вöчны сэтшöм сиктъясö, кöнi абу интернетыс. «Устранение цифрового неравенства» программаö «Ростелеком» пырöдчис 2018 воын нин. Медшöр могыс – могмöдны татшöм объектъяслысь бура уджалöм.
Талун район пасьта сикт-грездъясын 62 таксофон. 2019-öд во помсянь нин позьö сёрнитны картатöг. Дон вештытöг позьö звöнитны «Ростелекомлöн» став гортса телепон вылö да и сотöвöй операторъяслöн телепонъяс вылö, суйöрсай кындзи. «Ростелеком» Коми филиаллöн Кулöмдiнса юкöнкöд сёрнитчöмöн Габовын водзмöстчысь йöз асланыс чукöртöм сьöм вылö вöчисны таксофонлы будка сямаöс, мед сёрнитiгöн позис саймовтчыны лёк поводдя дырйи зэрысь либö турöбысь.
Специалистъяс быд тöлысь видзöдöны ёна-ö сёрнитöны таксофонöн, донъялöны сылысь коланлунсö. Öд таксофоныс кö ковтöм, сiйöс вермасны бырöдны или вуджöдны мöдлаö, кöнi коланаджык, районса администрациялöн корöм серти.

• Дерт, татшöм кöдзыдъяс дырйи кынмö став аппаратыс. Таво январын миян уджалысьяс тöвзьылiсны лым вывтi ветлан техникаöн Вöль да Сотчöмув грездъясö, зарядитiсны пуксьöм аккумуляторъяс, вöчисны мукöд удж. Таксофон сувтöдöма сёрнитöм вылö, но дурöны челядь да вель ёна падмöдöны аппаратлысь уджаланногсö. Кадöн ог артасьöй, тöв кöть гожöм петам туйö бырöдны жугалöминъяс, орöминъяс, мед йöзлы пыр вöлi бур йитöд, — сёрнитiс «Ростелеком» Коми филиаллöн Кулöмдiнса юкöнöн веськöдлысь Т.В.Тимошина.
  Татьяна Чувьюрова.