Тайö ыджыд чесьт

Донысь Виталий Попов зэв рад, мый веськалiс Плесецкö. Служитны космодромын — тайö ыджыд чесьт. Космическöй войска пырö медбуръяс лыдö. Плесецксянь катöдöны космосö унатор — быдсяма спутникъяс, глонасс, ракетаяс. Кор космосö кайö корабль, ставыс тiралö да дзöрö, зiньгöны öшиньяс.
Армияын служитöм бöрын айму дорö муслун ёнмö и ёнмö. Тадзи чайтö Донса зон, кодi кольöм воын ефрейтор чинын бергöдчис чужанiнас. Виталий веськалiс служитны Архангельск обласьтö космическöй войскаö. Плесецк лыддьысьö Россияса медводдза испытайтан космодромöн. Сэнi жö сулалö Европаын медыджыд заправитчан станция. Буретш ракетаяс öддзöдан блокъяс заправитан котырö и веськалiс Виталий. Налöн медшöр могыс вöлi видзны-дöзьöритны заправитчанiнсö. Плесецкын вöдитчöны уна пöлöс ломтасöн — танi и азот, и кислота, и амил да гептил. Химияыд уна. Аскöд пыр колiс новлöдлыны противогаз, пасьтавны ломтасöн могмöдiгöн.
9 класс бöрын Виталий мунiс велöдчыны Сыктывкарса техникумö автомеханикö. Куим во велöдчöм бöрын босьтiс водительлысь В да С категорияяс. Удж вылö пырны эз удит. Босьтiсны армияö.
Виталий юксис, мый армия велöдiс сiйöс ёнджыка пыдди пуктыны чужан му, овны кывкутöмöн, кывзысьны ыджыдджыкъясöс, айлов котырын öтув пöртны олöмö могъяс, венны сьöкыдлунъяс. Виталий тöдчöдiс, кыдзи Плесецкын ёртасьöмöн да öта-мöдöс пыдди пуктöмöн служитiсны уна национальносьта войтыр. Выль во кежлö лöсьöдлicны чöскыд сёяна пызан. Асьныс жö гажöдчисны — сьылiсны да йöктicны, петкöдчисны быдсяма творческöй номеръясöн. Айму доръян лунö часьтлöн командир чолöмалiс ставнысö да сиис бура служитны, лоны пыр дасьöн дорйыны айму.
Артур Гарнов.
Снимок Виталий Поповлöн чукöртöмысь.