— Öнiя школа, öнiя велöдысь, тайö енбиа, ассьыс уджсö бура тöдысь, уджас пыр выльтор пыртысь велöдысь. Сöвмö олöм, сöвмö и велöдöм, да олöмкöд тшöтш колö восьлавны и тöдöмлун сетысьяслы. Талунъя челядь, кöнкö да, сюсьджыкöсь верстьöысь, аслыспöлöсöсь, зэв торъяланаöсь, унатор нин тöдöны, да колö аслыд сöвмыны накöд öттшöтш, уджö пырты выльтор. Сöмын выль велöданногöн, пыр велöдчöмöн позьö ышöдны найöс, бур тöдöмлунъясöн петкöдны аскиа олöмö, — сёрнитiс Керчомъяса шöр школаын том велöдысь Диана Андреевна Тарабукина.

Ачыс сiйö Керчомъяысь. 2020-öд воын пырис велöдчыны Сыктывкарса канму университетö «Коми филология, финноугроведение да регионоведение» юкöнö. Велöдчыны мунны ышöдiс классöн веськöдлысь Алексей Сергеевич Паньков. Вит во велöдчöм бöрын локтiс бöр Керчомъяö.

— Кöсъя уджавны, босьтны сям сиктса школаын. Том велöдысь мöвпалö сiйö лун йылысь, кор медводдзаысь пырас классö, öд тайö здукыс сылы торйöн нин тöдчана. Ставыс сылы выльтор — велöдчысьясыс, кыпыдлуныс, школаса олан руыс, — нюмдыштöмöн висьталiс Диана Андреевна.

Водзмöстчысь том велöдысь тыр сьöлöмöн пыр жö кужис сибöдчыны велöдчысьяс да уджъёртъяс дорö. Та серти нин тыдалiс, мый сiйö збыльысь сьöлöмсяньыс радейтö ассьыс профессиясö. Диана Андреевна олö бать-мамыскöд. Кыдзи сiйö висьталö, сылы сиктас ставыс дона, матысса. Диана Андреевна нуöдö роч да коми кыв да литература урокъяс. Сылöн сойборд улын витöдсянь дас классöдз велöдчысьяс. Сiйö сiдзжö веськöдлö квайтöд классöн.

— Ме бöрйи тайö профессиясö, мед воссьыны аслым, мед челядьлы сетны унджык тöдöмлунъяс, кужöмлунъяс. Медводдза кадад, дерт, гöгöрвотöм на ставыс: он тöд, кыдзи челядьыскöд сёрнитнысö, он тöд, кыдзи уджалан котырö велавны, он гöгöрво, кыдзи ноксьыны документъясöн, но ставыс, чайта, артмас кад мысти. Ме таысь ёна ог мырсьы, а водзö велöдча и ачым. Велöдча овны верстьö олöмас. Медшöрыс оз ков повны, мый сиктад лоö гажтöм: уджыс кö тырмымöн — гажтöм оз ло. Мый-мый, а челядьыдкöд тöждыс пыр уна, — тöдчöдiс Диана Андреевна.
Том велöдысьлы уджыс кажитчö — и сьöкыдлуныс эм, и кокньыдлуныс эм. Сiйö кöсйö водзö быдмыны тайö профессияас, велöдчыны, сöвмыны.
Наталья Гилева.
Снимок Никита Кирилловыхлöн.