Ульянаысь крестьянин овмöс кутысь Елена Евгеньевна Тарабукиналöн, артмö, тшöтш и Игорь Михайлович верöсыслöн öтувъя котырын бара на тшукис ыджыд бур лоöмтор — воссис комын юр куканьлы выль карта. Паськöдчыны лоис быть, öд налöн овмöсын талун ставнас 73 сюрук, на лыдысь 47 мöс. 2017-öд воын кыпöдöм 50 юрлы картаын лоис дзескыд. 2022-öд воын Елена Евгеньевна «Семьяöн ферма кыпöдöм» балаöн пырöдчис видз-му овмöс министерстволöн конкурсö да шедöдіс грант. Тöдчана отсöг вичмис и «Монди СЛПК» акционер котыркöд ёртасьöм йылысь сёрнитчöм серти. Выль карта кыпöдны босьтчылісны кольöм воын. Вöчасис Ижевскысь «Агрострой» котыр. И со сійö дась.

Август 23-öд лунö ферма кыпыда восьтігöн волісны республикаса да районса кывкутысь йöз, сиктса олысьяс. Шаръясöн мичаа гажöдöм, югыд кыпыд картаö любö пырнысö весиг. Воöм гöсьтъясöс мыла сьыланкывйöн вочаалiсны Кужса культура керкаысь «Ясные зори» котырса аньяс. Овмöсса кöзяин Игорь Михайлович Тарабукин пöся аттьöалiс ферма кыпöдны отсалысьясöс, а стöчджыка кö, видз-му овмöс министр И.М. Андарьяновöс, районса юралысь С.В.Рубанöс, «Агрострой» котырысь менеджер В.Ю.Ожеговöс да видз-му овмöс юкöнöн веськöдлысь А.Р.Яроваöс да вичмöдiс налы аттьöалан гижöдъяс. Ильдар Махмутович Андарьянов воча аттьöалiс Тарабукинъясöс районын видз-му овмöс сöвмöдöмö ыджыд пай пуктöмысь, ассьыныс овмöссö кужöмöн кутöмысь да нöшта на паськöдны зiльöмысь. Найö лоöны бур примерöн мукöд крестьянин овмöс кутысьяслы.

Сергей Владимирович Рубан тöдчöдiс, мый «Терпенньö да удж ставсö венöны» шусьöг буретш и лöсялö Тарабукинъяслы. Бергöдчывны кöть 2011-öд воясö, кор Елена Евгеньевна босьтчис асшöр уджö. Сэки уджöн могмöдан шöринсянь сылы вичмис грант. Отсалiс и районса администрация. Ань медводдза кадас полiс на, артмас-ö сылöн босьтчыны уджас, зумыда сувтны кок йылö. Но вочасöн ставыс ладмис, дерт, помтöг зiльöмнад жö-а. Ньöбис бур мöсъяс, кыпöдiс 20 юр-лы карта, а сэсся босьтiс и трактор, кöрым заптан техника. Скöт лыд содтöмöн, кыдз казьтыштлiм нин, 2016-öд воын кыпöдiсны 50 юрлы выль ферма. Та могысь Елена Евгеньевна бара жö пырöдчылiс «Семьяöн ферма кыпöдöм» балаöн видз-му овмöс министерстволöн конкурсö да шедöдiс грант. Сьöма отсöг чуктiс тшöтш «Монди СЛПК» акционер котырсянь. Тадзи помтöм зiльöмöн, удж дораныс сьöлöмсяньыс матыстчöмöн, ас вынъясыслы эскöмöн овмöссö вочасöн ёнмöдöмöн Тарабукинъяс зумыда сувтiсны кок йыланыс.

• Районын крестьянин овмöс кутысьяслöн воысь воö кыпалöны выль скöт картаяс, — нимкодьпырысь содтiс Сергей Владимирович. — Аттьö видз-му овмöс министерстволы та кузя балаяс олöмö пöртны отсалöмысь. А Елена Евгеньевналы да Игорь Михайловичлы сиа, медым выль карта тырас кукъясöн, и мед тайö фермаыс эз ло бöръяöн. Олöй водзö вылö могъясöн, а ми отсалам, мыйöн вермам.
  
• Чолöмалан кывъяс висьталiсны и Василий Юрьевич Ожегов да Анастасия Ревокатовна Ярова. Фермасö кыпыда восьтiсны, гöрд лента вундiсны И.М. Андарьянов, С.В.Рубан да И.М.Тарабукин.
  Карта пытшкöс кытшовтiгмоз овмöсса кöзяин кыв-кутысь йöзлы висьталiс, мый матысса кадö кукъяссö вуджöдасны выль олан-iнас. Тöдчöдiс, мый бöръя кадас мöсъясöс, матö 40 процентсö, кутiсны вайсьöдны икусственнöя тырсьöдöмöн. Гожöмын чужис дас гöгöр, а öнi бöръя лунъясö öтпырйö нёль кук. Сюрукъясöс тöвйöдны заптiсны тырмымöн кöрым — вöчисны сенаж да турун. Пуктысьöмсö эз на дзикöдз эштöдны. Юр лыд ыдждöдöмкöд содтысисны и видзьясöн. Талун найö кöртымалöны сортоучастоклысь, Кулöм ю бокысь да Кулöмдiнлöн мöдлапöлысь бурмöдöм видз-муяс. Кольöм воын мöдлапöлö пыранiнö вöчисны пос, шор вомöныс сюйисны труба, ветланiн юкöнсö шыльöдiсны-лöсьöдiсны лючки. Тайö уджъяссö нуöдны сьöмсö вичмöдiс бара жö «Монди СЛПК» акционер котыр. Ульянаса манастыр эновтчис видзьяссьыс, да сылысь на таво содтöд босьтiсны 120 гектар, кодöс межуйтiсны. Та мында видз вылад заптöм кöрымыс сэсся тырмымöн нин лоас, кöнкö. Игорь Михайлович висьталiс, мый гырысь пемöсъясыс гожöмын кызвынсö йирсьöдчанiнынöсь. Квайтöд во нин найöс «дöзьöритö» бисянь уджалысь пастук. Скöт юр ыдж-дöдöмöн сöмын пö тай колö содтöд йирсьöдчанiн. Крестьянин овмöс кутысьяслöн уджыс помасьлытöм.
  
• Тарабукин гозъялöн Данил пиыс медшöр отсасьысьныс. Сiйö бать-мам вылö видзöдöмöн сiдзжö пырöдчис видз-му уджö. Артмö, ичöтик посёлокын кыпалö-паськалö семьяöн сöвмöдан татшöм ён крестьянин овмöс, кодi ас вöлöгаöн могмöдö оз сöмын районса, но и юркарса олысьясöс. Сылы сöвмыны водзö на.
  Галина Нестерова.
  Снимокъяс гижысьлöн.