Кор мунан кытчöкö ылö, век гажыд бырö чужан мусьыд. Ме тай коркö Анапаын тöлысь уджалі лагерын. Шойччан лунö муні гуляйтны, аддзи машина, гижöма 11 регион, сідзкö, Комиысь. Окота лоис весиг матыстчывлыны, но син улö усис мича ань, киас Сыктывкар гижöда пакет. Сьöлöмöй муртса эз чеччышт, окота вöлі сійöс дзигöдлыны, но йöйöн, мися, чайтасны, да ог нин. Эскöй кöть эн, но тайö öти сиктса зонъясыс паныдасясны Афганистанса гöраясын. Кык вок звöнни Василий да Иона Михайлович Игнатовъяс да Александр Андреевич Глуханич ёртныс. Нимкодь здукъяс йывсьыс гижны весиг кывйыд оз сюр.

А йитö ёртъясöс унатор: Помöсдін, сынöдса десантлöн войска, салдатъяслöн Литваын велöдчöм, Афганистан, öпаснöй служба да виччысьтöг аддзысьöм, спорт да уна мукöдтор. Школа помалöм бöрын Василий да Иона вокъяс мöдöдчисны велöдчыны 33 номера Ухтаса училищеö буритчысьясö. Кыкнанныс спортсменъяс, ыджыд тушаа, сюсь коми зонъяс. Эз на удитны ёнасö и уджалыштны, медводдза вахта вылас нин и воöма повестка военкоматö. «Армияö? Мунам, дерт!».
Пыр жö веськаласны Литваö, 1986-öд воын сэні сынöда десантлöн учебка вöлöма. Сэні кык батальон торйöн дасьтöмаöсь Афганистанын служитöм могысь. 8 ротаын велöдöмаöсь отделениеöн веськöдлысьясö, шоперъясö, оператор-наводчикъясö. Но эз дыр.

Со и Кабул, застава, 12 номера рота. Во служитöм мысти и аддзысясны ёртъясыд. Налы тöдсаöсь Хост, Джавара, Сатэ — Кандав иннимъяс, вöрöглöн «Сьöд аист» элитнöй подразделение, кишлакъяс да сідз водзö. Тöдса и öпаснöй службаыс.

— Василий, висьталыштöй служитöм йывсьыд.
— Миянöс пыр ыстывлісны боевöй заданиеяс вылö. Колльöдны груз либö колонна. Дерт, куш БМП-сяньыд лыйсьöмöн колоннатö видзны он вермы, «духъяссö» НАТО да пакистансаяс ёна нин велöдöмаöсь воюйтнытö да. Колоннаыскöд тшöтш машинаясöн век мунö кык гаубичнöй батарея, öтиыс 15 километра водзын, сэсся вежсьöны. Тайö öружиенас кö лыян, гöраясыс весиг сыркъявлöны. Сулалам коркö öтчыд гöра йылас, лыйлöны весиг югзьöдан снарядъяснас, муртса эз веськавны. Ас вöчöм реактивнöй снарядсö пуктöны из выланыс и сизьдöны. Гöраясас сьöкыд нуöдны тышъяссö. Меным ачымöс дорйыны, сюся котравны отсаліс спорт школаын лыжиöн котралöм. Николай Павлович Игнатов тренерлы унаысь сёпасибöтö и шулывлы. Ачыс, дерт, та ылнасяньыд эз кыв. Ёртъяс унаöн эз воны бöр гортаныс. Интаысь Руслан Мирзаев, Вуктылысь Олег Киселёв, лыйсян зэр улö веськаліс Сосногорскысь Вадим Носков, Белоруссияысь Олег Боровенко… Казьтывлам, ог вунöдöй найöс.

Лыйсьöны дзебсясьöмöн кустъяссяньыс, сэки уналы вермасны веськавны, либö минаяс вылын машинаяс пасьмунісны, вертолёт усис да сідз водзö. Война, война и эм. Медся мустöмторыс, мый наянитöмöн лэдзчысьöны прöстöй йöз улö, горзöны öд весиг рочöн «русский, здоров». Öнія Украинаса мытшöдын тай вöрöгъясыс пасьтасьöны бабаясö, медым петны кытшсьыс да унджык на лёксö вöчны. Но тайö йöз смек, тадзи мужичöйяслы тышкасьны оз позь.

— Василий Михайлович, Афганистанысь локтöм бöрын кыдзи артмис олöмныд?
— Иона вок олö Ухтаын, уджаліс мусир да биару перйысь буритчысьöн, öні пенсия вылын. Сылöн аслас котыр, Руслан пи. Ме ола Помöсдінын, уджала «Монди СЛПК» акционер котырын вöр петкöдысь машинист-трактористöн. Аслам котыр, Евгения ныв да кык внук нин эм: Ярослав да Кирилл. Локтан вося тöвшöр тöлысь медводдза лунö тырас нин 55 арöс. Помöсдінын водзö нуöдам спортивно-патриотическöй удж. Александр Глуханич котыртлö «Зумыд ош» коми йöзкостса тыш, том йöзлы лагеръяс, ордйысьöмъяс. Ми кутам отсасьны. Том йöз дінö шыöдча: «Сöвмöдöй асьнытö, ёртасьöй спорткöд, эн ышмöй курыдторъясöн да тшынасян дурмöдчанторъясöн. Олöмас сы мында интереснöйыс. Олöмсö енмыс сетöма йöзлы да матысаясныдлы лоны коланаöн, овны югыда. Радейтöй чужан мутö, кывтö, дорйöй найöс быдлаын».
Жанна Сизева.
Снимок Василий Игнатовлöн чукöртöмысь.