Ноябр 15 лун — армияö мунысьяслöн ставроссияса лун

Ноябр 1-öд лунö республикаын пансис том йöзöс армияö нуан кад. Таво районысь армияö урчитiсны нуны матö ветымын мортöс. Куим лун чöж нин военкоматын салдатпуясöс видлалiсны бурдöдысьяс. Кодсюрöяс тöдöны нин, кутшöм войскаö веськаласны.

— Чужи-быдми Ручын, 9-öд классöдз велöдчи сэнi жö, — сёрнитiс Аркадий Сергеевич Расов. — Сыктывкарса педучилищеын велöдчи физкультурникö. Бöръя воас артмис сiдз, мый ковмис мунны Йошкар-Олаö, велöдчöмсö эштöдi сэнi, босьтi диплом.

Кöсйис мунны армияö, но эз босьтны. Синмыс лёка аддзис, сетлiсны кад вöчны операция. Таво гожöмнас локтiс да шыöдчис военкоматö, сэнi вöзйисны велöдчыны С категорияа водительö. Велöдчис Ухтаын. Октябр шöрын бергöдчис нин гортас. Корисны военкоматö бурдöдысьясöн видлöдчöм могысь.

— Видзöдлiсны-донъялiсны дзоньвидзалунöс, ставыс бур, — водзö висьталiс Аркадий. — Сетiсны повестка, ноябр 22-öд лунö колö локны военкоматö. Мöд лунас нуасны нин Княжпогостö, сэнi бара донъяласны дзоньвидзалун.

Том мортлы висьталiсны нин, мый служитны веськалас Архангельск обласьтса Плесецкö военно-космическöй войскаясö. Гортас сiйöс кутасны виччысьны бать-мам да кык ичöтджык вок. Лоас кö сьöлöм сертиыс, гашкö, кольччас контракт серти. Но ставыс на водзын, служитiгад кымынысь на вежсьыласны мöвпъясыс. Колокö, чужан сиктыд кыскас на бöр.

Армия — томъяслöн олöмын выль тшупöд. Некод оз шу, мый сiйö кокньыд, но сiйöс вуджны быть.
Пасъям, таво миян районса зонъяс веськаласны военно-космическöй, мувывса да кöрт туйса войскаясö.

Алёна Ермакова.
Снимок гижысьлöн.