Уна во нин Ручын кыпыда пасъям сиктлысь гаж – Илля лун. Сы кежлö дасьтысигöн культура керкаöн веськöдлысь Надежда Михайловна Подюкова корö мукöд сикт-посёлокысь сьылан-йöктан котыръясöс. Ас сиктсаясöс да гöсьтъясöс пыр чöсмöдлöны бипур вылын пуöм юкваöн, чайöн да пöжасъясöн. А таво коронавирус ыджыдалöмöн гажöдчим сöмын ас чукöрöн. Внук-внучаясыскöд сьылан-йöктан котыр кайлiс Öлекö «Мишкин лес» шойччанiнö. Ворсiм, сьылiм и номсасим. Вом кöтшын пыр на бипур вылын пуöм шыд да кöчанлöн кöрыс. Аттьöалам Вологжанин гозъяöс бура вочаалöмысь. Дасьтiсны бипур пестыны пес, орччöн сулалiс самöвар. Аттьö и Ручса юралысь Дмитрий Вениаминович Кирушевлы машинаöн могмöдöмысь. Бур кывъяс висьталам сьылан котырö ветлысьяс Владимир Леонидович да Иван Андреевичлы чöскыдысь-чöскыд шашлык пöжалöмысь да самöвар пузьöдöмысь. Надежда Михайловна ворсöдiс: чеччалiм скакалкаöн, котралiм обручöн, веглясим номыр моз. И ставыс серамсорöн да гажаа. Внукъяскöд ворсiм мачöн, исласим кырсянь, удитлiм лэччывлыны и ва дорö. Владимир Леонидович пызан сайын пукалысьясöс чолöмалiс мича сьыланкывйöн Илля лунöн. А пызаныс вöлi «чегö». Таво вöр нимкодьöдiс озырлуннас. Воысьяс лэпталiсны пражитöм да сола тшак, уна сикас варенньö, вайисны и пирöг да шаньга. Быттьö корöм серти, луныс вöлi мича. Олiм, бурпöт шойччим асывсянь рытöдз, таысь висьталам ыджыд аттьö Надежда Михайловналы. Александра внучкаыс ставсö снимайтiс, гижис и видео вылö, да культура керкаын чукöртчылiгöн видзöдам да мöвпъясöн бергöдчылам Öлекö.
Ставöн эскам, мый лöняс лёк висьöмыс, да кыдзи и водзтi кутам гажöдчыны Ручса культура керка дорын.
Екатерина Ульнырова.
Руч.
Снимок гижысьлöн.