Самолёт да казьтылан пас

[ A+ ] /[ A- ]

Таво Югыдъягын да Вочыны Президентлöн грант тшöт весьтö олöмö пöртасны кык уджтас.

Югыдъягса олысьяслöн öнi на вежöрын, кыдзи октябр 19-öд лунö, 1992-öд воын, АН-28 самолёт усис да сотчис Немдiнса аэропортсянь Сыктывкарö лэбигöн. Кувсис 13 лэбысь да 2 летчик. Ловйöн колис сöмын öти нывбаба. Кулысьяс пöвстын вöлi и чуж кагаа мам.

Ас йöз йылысь югыд паметь видзöм да быдмысьясöс тöдмöдöм, а медсясö, лёкторйысь видзчысьны коланлун тöдчöдöмöн, Югыдъягса асвеськöдлан котыр Ангелина Ивановна Ковальчук юрнуöдöм улын дасьтiс Россияса Президентлысь грант шедöдан уджтас да вермис. Таво арталöны збыльмöдны.

— Вöвлöм аэропорт местаö вöчасны да сувтöдасны самолётлысь макетсö. Танi лоö мича парк сяма шойччанiн. Сэтчö локтысьяслы позяс пукыштны мича лабичьяс вылын, лыддьыны аэропорт йылысь вöвлöмторсö, — висьталiс котырöн веськöдлысь.
Районса ветеранъяслöн котыр тшöтш пырöдчис Президентлысь грант шедöдöмö. Вермис. Таво улыс Вочын сувтöдасны Айму вöсна Ыджыд тышын усьöмаяслы пас. Вочса юралысь Николай Фёдорович Морохин отсалас колана материалöн. Сиктса библиотекаын уджалысь да школаын велöдысьяс челядьлы котыртласны вöрöгысь Айму видзысьяслы сиöм нуöданторъяс.

Июнь тöлысьын ваясны паслысь плитаяс, серпасаласны да гижасны война вылö ветлысьяслысь нимъяссö, да сувтöдасны.
Сьöм шедöдöм могысь вылö донъялана кабалаяс гижны отсасисны районса администрацияысь специалистъяс Ирина Валериевна Лодыгина да Ольга Ивановна Чувьюрова.
Снимокъяс öтуввезысь.
Татьяна Чувьюрова.

Комментарии:

Добавить комментарий

Свежий выпуск: 18 апреля

Осторожно — мошенники!