— Быдмим дзузгана би улын, велöдчим керосина лампа улын, тöдлiм став сьöкыдсö, да öнi быттьö райын олам, — важас бергöдчылiс Ручысь Галина Александровна Павловская, а сэсся казьтывлiс воддзасö.

Александр Николаевич Попов батьсö босьтiсны война вылö, вöлi разведчикöн. Öтчыд тöвнас дзебсьöмöн дыр кыйöдiсны вöрöгöс, ёна кынмалiс. Веськалiс госпитальö, да вундiсны öти кок лапасö. Дыр бурдöдчöм бöрын комиссуйтiсны. Гортас бергöдчис 1944-öд воын. Анна Алексеевна Холопова мамыс став сьöкыдсö пыкис тылын. Сiйö войнаöдз петавлiс верöс сайö да чужтылiс кык челядьöс. Верöсыс война вылын вошис туй ни пом, 1939-öд воын быдтасъяссö ичöтöн на «нюлыштiс» сьöкыд тöдтöм висьöм. Сэки уна семьяын челядьныс кувсисны, кодкö тшыгла, кодкö висьöмла.

Александр Николаевич комиссуйтöм бöрын бергöдчис чужан сиктас. Сьöлöмсö вöрзьöдiс Анна Алексеевна, мусмисны öта-мöдныслы. 1945-öд вося февральын чужис Галина. Батьыс куимысь ветлiс гижöдны аслас овнас нывсö, но сикт сöвет пыр вöлi пöдса, да эз и ло пасйöмыс. Тэ пö Попова, эн вунöд. Попова овöн и велöдчис сизимöд классöдз. Кор сöмын на босьтчисны стöча пасъявны сиктса олысьяслысь ним, вич, овсö, сэк и тыдовтчис, мый нывкалöн колис мамыслöн овыс — Холопова.

Бать-мамыс лун и вой уджалiсны колхозын.
— Мунасны бать-мам му вылö, менö вöв телегаö пуксьöдасны, ме унмовся. Костъясас нёньöдыштас да уджалö водзö. Арнас вундiсны шобдi да нянь, гортö локтам пемыднас нин. Батьöй регыдöн кувсьылiс висьöмысь. Мамöй вöлi ыджыд, ён да зiль, менö öтнамöс кыдзкö вермис быдтыны, вöдитлiс уна град выв пуктас, — казьтылiс олöма ань.

Сизимöд класс бöрын нывка пырис велöдчыны училищеö штукатур-малярö. Окота пö, дерт, вöлi техникумö, но сиктса коми челядьыд эз кужны сёрнитны рочöн, кöть и гöгöрвоисны да лыддьысисны. И нэмсö зiлис босьтöм специальносьт серти. Петiс верöс сайö. Осип Осиповичкöд вуджисны овны Ухтаö. Гозъя чужтiсны пиöс, шуисны Андрейöн. Ичöтдырйи сiйö быд гожöм коллявлiс Анна Алексеевна ыджыд мамыс дорын. Велöдчигас нин каникулъяс дырйи уджалiс совхозын, ас тшöтшъяясыскöд тöв кежлö заптылiсны турун. Тыдалö, ыджыд мамыслöн да мамыслöн зiльлуныс вуджис и сылы. А рытъяснас, шойччигöн, кывзылiс Анна Алексеевналысь важ сьöкыд олöм йылысь висьталöмсö.
Татьяна Чувьюрова.
Снимок Екатерина Ульныровалöн.