«2020-öд вося медся бур призывник» республикаса конкурсын вермис Немдiнысь Данила Мальцев. Петкöдчыны том мортöс ышöдiс райвоенкомат. Вынöн, сямöн, тэрыблунöн да армияын служитiгкежлö мукöд кужöмлунöн нёль лун чöж вермасис республикаысь 20 салдатпу. Мöд лунсяньыс нин миян зон гöгöрвоис, мый парскас ставнысö. Подулыс вöлi. Ёртасьö спорткöд, школаын велöдчигöн петкöдчис «Зарница» до «Орлёнок» ворсöмъясын, райвоенкомат пыр кыкысь видлiс пырны Санкт-Петербургса военнöй академияö, кöнi экзаменъяс дырйи кутчысисны салдат олöмö.

• Конкурсыс мунiс Кöрткерöсын Россияса ДОСААФ-лöн юкöнлöн салдатпуясöс дасьтан аэродромын. Медводдза лунас лыйсим, велöдiсны восьлавны стройын. Мöд лунас котöртiм 3 километра да 100 метра. Кыкнанас ме лои медся тэрыбöн. Нöшта колiс лэптысьны турник да кыпöдчыны брус вылын. Коймöд лунас кадöн резьöдiм-чукöртiм автомат, танi лои коймöдöн, да чукöртiм автоматлысь магазин, кöнi бöрö коли ставнысö. Лыйлiм граната. Донъялiсны гарнизонын службалысь Устав да Великöй Отечественнöй войналöн история кузя тöдöмлун. Ме буретш радейта, видзöда кино, корсьыся да тöдмала мыйкö да выльтор Великöй Отечественнöй война йылысь. Тайö юкöнас лои коймöдöн. Конкурсын ставыс вöлi тöдса, нинöм сьöкыдыс эз вöв. Зэв бура котыртiсны нуöданногсö, чöскыда вердiсны куимысь лун, пывсим быд лун, — висьталiс Данила.
  Вермöмысь пасйисны дипломöн, тшöтш и районöс, вичмис кубок, козьналiсны «2020-öд вося медся бур призывник» гижöда часi. Данилалы сетiсны позянлун аслыс бöрйыны, кытчö мунны служитны. Дерт, окотитö медбур войскаö, но матöджык чужанiн дорö.
  Ичöтсянь дзоньвидза оласногö сiйöс ышöдiс Вадим ыджыдджык вокыс, кодi öнi ОБЖ велöдö Эжваса школаын. Ворсiс баскетболысь, велöдысьыс Василий Иванович Игнатов, радейтана урокöн вöлi ОБЖ. Буретш сiйöс велöдысь Владимир Георгиевич Шешуков сетö ыджыд тöдчанлун армияын служитiгкежлö дасьтысьöмлы. Прöст кадö Данила котралö школалöн стадионын, горт дорас эм вын-эбöс песан турник. Кык вок вылö видзöдöмöн оз кольччы асьсö сöвмöдöм-ёнмöдöмын дасöд классö пырысь Леонид вокыс.
  Том морт велöдчис Сыктывкарса вöр институтын инженер-экологö, но гöгöрвоис, мый тайö уджыс абу сылöн, да эновтiс. Таво арнас мунас армияö да служитöм бöрын кöсйö велöдчыны мöд специальносьтö нин.
  Марина Дадашова.
  Снимокыс «Комиинформ» сайт вылысь.