Март 14-öд лунö Евдокия Егоровна Фёдоровалöн вöлi тшупöда пас, тырис 90 арöс. Сiйöс чолöмавны волiсны районса администрацияöн веськöдлысьöс вежысь Наталья Анатольевна Левченко, «Кулöмдiн» овмöдчöминса администрацияöн веськöдлысь Виктор Петрович Игнатов да сиктса ветенранъяслöн котырöн юрнуöдысь Валентина Петровна Нестеренко.
Евдокия Егоровна чужис Сысола районын ыджыд семьяын. Быдмисны 10 челядь. Грезданыс эз вöв школаыс, да ковмис котравны 10 верст сайö Визинö. Унджыкысьсö, дерт, подöн. Война заводитчöм бöрын ыджыдджык вокъяссö босьтiсны фронт вылö. Василей вокыс пуктiс юрсö вöрöгкöд тышын, мукöдыс локтiсны кодi ранитчöмöн, кодi висьöмöн. Бать-мамыс уджалiсны колхозын, но век кутiсны ас овмöс.
Сизим класс помалöм бöрын Евдокия Егоровна мунiс велöдчыны медсестраö Сыктывкарса медицина техникумö. 1950-öд воын помалiс, да мöдöдiсны сэки Помöсдiн районса Пожöгö. Бурдöдчанiнсö сöмын на вöлi кыпöдöны, но лöсьöдiсны öти жыр. Сэнi и босьтчис уджавны.
— Миянöс, кык томиник нывкаöс, овмöдiсны öти жырйö. Кык во мысти эштöдiсны больнича стрöитöмтö, да сэтчö локтiсны врач да фельдшер. Фельдшерыс, Константин Семёнович Фёдоров, фронт вылын ёна ранитчöма да локтiс кöстыльяс вылö мыджсьöмöн. Бöрынджык сiйö и лоис менам верöсöн. К.С.Фёдоровлысь семьясö кулакавлöмаöсь да ыстывлöмаöсь Коми АССР-ö. Сылы 7 арöс и вöлöма. Но велöдчöма. Пожöгö локтöдзыс вöлöма нин гöтыра, быдмис кык пи. Но гöтырыс кувсьылöма. Ми верöскöд чужтiм нöшта кык пиöс да быдтiм 4 челядьöс. Öнi колисны куимöн. Верöслы бур уджысь сетлiсны Трудöвöй Гöрд Знамя орден. Йöзыс пыр на казьтывлöны сiйöс, — бергöдчылiс важас олöма ань.
Гозъя пыр олiсны скöтöн, видзисны кöзаясöс да ыжъясöс. Верöсыс висьöмысла кувсис водз. Евдокия Егоровна öнi олö Кулöмдiнын. Войнаса ветеран дöвалы 2013-öд воын сетiсны бур патера.
Е.Е.Фёдороваöс бур уджысь пасйылiсны почёт грамотаясöн, ошкана гижöдъясöн, «Уджвывса ветеран» медальöн, сетлiсны дона козинъяс.
Валентина Нестеренко.
Кулöмдiн.
Снимок районса администрациялöн сайт вылысь.