И кольччис районö
Лунвывса том мортöс эз повзьöдны öта-мöд костас ыджыд костъяса ылi сиктъясö лёк туйясöд воöдчöм, няйт пыйтi собалöм, кöдзыд тöвъяс. Сьöлöм вылас воисны öта-мöдлы пыр отсасьысь уджалан котыр, восьса да шань сьöлöма коми йöз.
Султан Джалалович Гунаев миян республикаö воис 1989-öд воын. Ачыс Чечня республикаысь Грозный карлöн Веденоысь. Кебанъёльын олiс да уджалiс ыджыдджык вокыс, армияын служитöм бöрын сы дорö волiгöн и мöвпыштiс кольччыны тшöтш. Буретш сэки пытшкöсса делöяс министерстволöн районса юкöнö ышöдiсны уджавны да бöрйисны том йöзöс, да шуис видлыны. Том мортöс пöся вочаалiсны районса юкöнын, ыстысны велöдчыны Татарстанса Елабугаын пытшкöсса делöяс министерстволöн милиция школаö. Кык во велöдчöм бöрын индiсны уголовнöй розыскö оперуполномоченнöйöн. Ёна и ковмис гызмавны район, эрдöдны мыж вöчöм. Кытчöкö да воöдчисны самолётöн, вертолётöн, юсайса сикт-посёлокъясö мунiгöн участокса уполномоченнöйяс вочаавлiсны пыжöн, уна верст вуджис и подöн.
1995-öд восянь уджалiс туясян юкöнын. 2004-öд воын ветлiс командировкаö Чечняö да 2007-öд воöдз сэнi видзис общественнöй пöрадок. Во джын кежлö волiс да бара мунiс Грозный карö командировкаö, контракт серти пытшкöсса делöяслöн управлениеын уджалiс старшöй следовательöн. 2016-öд воын бергöдчис районö да во вöлi участокса уполномоченнöйöн Кулöмдiнын. Вуджис дознание юкöнö да öнiöдз сэнi зiльö старшöй дознавательöн. Тайö юкöнсаяс туялöны мыж вöчöм, воас кö дежуритан юкöнö кутшöмкö лоöмтор йылысь юöр, туясьысьяслöн да оперумолномоченнöйяслöн котыркöд пыр жö петöны туйö. Овлö, мый накöд уджалöны и экперт да кинолог.

• Августын öти сиктын айловлысь пышйöдiсны машинасö, миянöс пыр жö кыпöдiсны. Тöвзим, ылö эз мун, орчча районын пыр и тшапким этш тöдтöмтö. Машинанас лэбзис гуранö, ачыс код юра, сулалiс орччöн. Кöсйис ылöдны, батьöй пö сетiс. Сэтчö жö локтiс машинаыслöн кöзяиныс. Воштысьны некытчö, ковмис висьтасьны, — сёрнитiс Султан Джалалович.
  20 сайö во миян районын. Та мында кадöн коми йöз пöвстын да коми сикт-грездъясын уджалöмöн гöгöрвоö и коми кыв. Нöшта öнi пытшкöсса делöяслöн районса юкöнын уджалысьяслы сетöны тöдöмлун коми кыв кузя. И велöдчö окотапырысь. Лыддьö тайö коланаöн и уджын, и олöмын.
  Марина Дадашова.
  Снимок пытшкöсса делöяс министерстволöн районса юкöнысь.