Нимöдас чужанінсö

[ A+ ] /[ A- ]


Тöдмасьöй Диана Расовакöд. Сійö велöдчö Ю.А.Спиридонов нима Коми республикаса юралысь бердын искусство гимназияын гуманитарнöй юкöнын 9-öд классын.
«Чужи ме Руч сиктын, Кулöмдін районын, Елена Валентиновна Расова мамöй уджалö Ручса шöр школаын библиотекаын, нöшта секретаралö. Гимназияын ме велöдча сизимöд классянь. А чуйдіс меным мамöй, отсаліс пырны Диана Алексеевна Гребенюк, коми кыв да литератураысь велöдысь. Куим вонад ме гимназияын удиті видлыны ачымöс быд боксянь нин. Дзолядырсянь радейта вöчасьны ас киöн, и ткачество урок вылö ветлöдла окотапырысь. Быдторсö кыны нин велöдчи. Нöшта ми пырöдчам журналистикаö. Ме тшöкыда гижася асланым школаса «Горадзуль» газетö.
«Сьöлöм вöрзьöдана снимок» нима гижöд йöзöдісны весиг «Коми му» газетын.
Рая баб йылысь гижöд меным вайис вермöм, козьналісны 700 шайт вылö сертификат, да «Ордым» вузасянінысь верми ньöбны коми гижöда футболка.
Гимназия сетіс меным уна бур. Велöдчи пырöдчыны туялан уджö. Кольöм воын гижи «Влияние уровня эмпатии на статус подростка» туясян удж. Татшöм сяма уджъяссö вöчигöн сöвман, велöдчан унаторйö. Таво петкöдчи коми кыв да литератураысь республика тшупöда олимпиадаын. Босьті мöд места. Меным зэв нимкодь. Сідз жö водзмöстча Россияса велöдчысьяслöн öтмунöмын, таво сетісны «Лидер личностного развития» пас. Нуöда собраниеяс, котырта аскöд тшöтшъяясöс, мед пырöдчыны уна пöлöс конкурсö.
Кöсъя шыöдчыны Кулöмдінса челядь дінö: « Эн полöй пырны велöдчыны кытчöкö водзланьö. Со миян гимназияын сэтшöм бура велöдöны сьывны, йöктыны, югзьöдны Коми мусö. Öд миян сайын Коми мулöн аскиа луныс».

  • Диана, а мыйла «Парма гор» газетö он ысты ассьыд уджъястö, öд и öти класса велöдчысьясыдлы интереснö да и ручсаясыдлы окота жö нимкодясьыштны?
  • Ме радейта Аймуöс. Кöсъя ыстыны уджъясöс. Кöсъя Руч сиктын олысь йöз йылысь унджык гижны.
    Чайтсьö, тайö сюсь, водзмöстчысь нывкалöн ставыс водзын. Нимöдас чужанінсö, дзирдыштас и ачыс.
    Жанна Сизева.
    Снимок гижысьлöн чукöртöмысь.

Комментарии:

Добавить комментарий

Свежий выпуск: 28 марта

Осторожно — мошенники!