Миянöс лыддьöны

[ A+ ] /[ A- ]


Кулöмдiн районын статистика серти 23 493 олысь, 70 гöгöр процент комияс. А ёна-ö лыддьöны коми кыв вылын петысь ас районса «Парма гор» газетнымöс?
Тавося январ кежлö гижöдчисны 1375-öн, кольöм вося тайö жö кадö вöлi 1420 морт. Медунаöн, дерт, лыддьöны ас районын, но судзöдöны и Кöрткерöс, Изьва, Чилимдiн районъясын да Ухта, Сосногорск, Усинск да Сыктывкарын. Йöзкöд сёрниысь тыдовтчö, мый газетсö лыддьöны семьяöн, весиг сиктъясын öта-мöдлы сеталöмöн. Сiдзкö, öти газетсö этша вылö шöркодя лыддьö куим морт, ставыс артмö нёль сюрсысь неуна унджык. Дерт, тайö абу уна. Вöлi кад, кор «Парма гор» волiс районса 5 сюрсысь унджык олысьлы. Но олöмыс вежсис, да талун мöдтор йылысь кöсъя висьтавны.
Öнi выльторъястö унджык йöзыс тöдмалöны öтуввезйысь. Талун ог нин вермöй шуны, мый тайö сöмын том войтыр. Пöшти быдöнлöн эм выльсикас сотöвöй телефонъяс да интернет, унаöн велалiсны вöдитчыны ноутбукъяс да планшетъясöн, лöсьöдiсны ассьыныс лист бокъяс да группаяс месенджеръясын. Сэтысь и лыддьöны выльторъястö. Сöмын ёнджыкасö сэнi гижöны районысь бокын лоöмторъяс йылысь. А öд мортыдлы окота тшöтш тöдны, мый вöчсьö ас районса матысса сикт-грездын. А та йылысь буретш йöзöдö районса газет.
«Парма гор» газетлöн öтуввезйын «ВКонтакте»-ын эм жö асланым лист бок. Сэнi пасйысьöма 4 600 унджык ёрт, луннас видзöдлöны выльторъяссö 6 600 сайö мортöдз, тайö тшöтш жö миян лыддьысьысьяс. Медунаöн лыддьöны верстьö войтыр: (31,4 процент) 45 вит арöсысь ыджыдджык нывбабаяс, 30-35 арöсаяслöн лыдыс 23 процент. Öтуввезйысь паськöдiс и лыддьысьысьяслысь, öнiя ногöн кö, географиясö. «Парма гор» лыддьöны республикаса пöшти став районын да карын, а сiдзжö Москваын, Санкт-Петербургын, Великöй Новгородын, Ростов-на-Донуын, Калининградын, Екатеринбургын, Пензаын, Кировын, Архангельскын да Россияса уна мукöд карын. И газетын уджалысьяслы зэв нимкодь, мый «Парма гор» газет радейтысьяс эмöсь суйöр сайын: Германияын, Нидерландыын, Японияын, Канадаын, Америкаын, Финляндияын, Чехияын, Сербияын, Сингапурын, Литваын, Казахстанын да уна мукöд государствоын. Асьным весиг эг виччысьöй татшöмторсö. Сiдзкö, ог на прöста зiльöй!
Ольга Васильева.
«Парма гор» газетысь шöр редактор.

Комментарии:

Добавить комментарий

Свежий выпуск: 28 марта

Осторожно — мошенники!