Миян йöз

[ A+ ] /[ A- ]

— Туясьысьяс кö воöны гортас дас час рытын, тайö водз на. Воис кö дежуритан юкöнö лоöмтор йылысь юöр, петам туйö лунын кöть войын, — висьталiс туясьысь Нурби Нуралиевич Напшев. Том морт помалiс Москваса государственнöй юридическöй университет да лоис юристöн. Велöдчигöн тöдмасис да видлiс уджалан сям мыж вöчысьясöс да мыж вöчöм корсян да туялан юкöнъясын, лоис окота уджавны тайö туйвизьын. Уджавтöдз ветлiс армияö, служитiс Москва дорса Балашихаын Ф.Э.Дзержинский нима торъя могъяса дивизияын, кодi видзö лöнь олöм да петкöдчö Победалы сиöм парадын. Сiйö восьлалiс жö Гöрд эрд вывтi, пасйисны медальöн. Бергöдчис районö, кöнi быдмис да велöдчис, кöнi виччысисны бать-мамыс. Вöлi участокса уполномоченнöйöн, во сайын вуджис туясян юкöнö. Туйдiс да велöдiс юкöнса начальник Елена Михайловна Рабканова. Медводдза туясьöмыс — керкаö пырöмöн сьöм гусясьысьöс корсьöм. Кузь киаöс «тшапкисны» суткиöн. Öтчыд öти овмöдчöминса морт юöртiс 112 службаö, мый администрациялöн керкаö пуктiс пасьвартантор. Пыр жö петiсны туйö став юкöнöн. Ветлiс весиг пытшкöсса делöяслöн юкöнса начальник. Корисны и МЧС-öс да «тэрыб отсöг сетан» юкöнöс. Корсьысисны да нинöм эз сюр. Код юра мортöс корсьны эз ков, сiйö вöлi гортас. Кöсйöма видзöдлыны, öдйö-ö локтасны. «Шмонитöмысь» мыждiсны чорыда. 
Нурби Нуралиевичлы уджын и олöмын ёна отсалö спорткöд ёртасьöм. Школаын на ветлöдлiс В.Н.Эрдни-Араев дорö, кодi велöдiс вермасьны. Сэки киöн вермасьöмöн шедöдiс спортса мастерö кандидатлысь ним. Ворслiс и футболысь. И öнi пыр ёнмöдчö, ветлö полициялöн юкöнса спортзалö, «Олимпикö». 
Гижöд да снимок 
Марина ДАДАШОВАЛÖН.

Комментарии:

Добавить комментарий

Свежий выпуск: за 8 августа июня