2019-öд воын Смолянкаын йöзлöн чукöртчылiгöн вöчны челядьлы ворсанiн корисны Надежда Алексеевна Есева да Зинаида Михайловна Кувардина водзмöстчысь аньяс. Югыдъягса юралысь Владимир Васильевич Паршуков вöзйис посёлокын олöм бурмöдöм могысь мöвпыштöмторсö збыльмöдны «Йöзкостса бюджет» бала серти. Сьöм вичмис энергетика да оланiн овмöс министерствосянь, торйöдiс овмöдчöминса администрация, пуктiсны и олысьяс.

Кыдзи висьталöны водзмöстчысьяс, чукöртны сьöм вöлi зэв сьöкыд. Йöз эз эскыны, мый ылi посёлоклы отсалас государство да позяс вöчны челядьлы ворсанiн. Надежда да Зинаида эз лэдзчысьны, сёрнитiсны-ышöдiсны водзö, чукöртiсны кырымпас да сьöм. Йöзкöд öтув бöрйисны места. Унджык олысьыс вöзйис сувтöдны пошта да лавка дорö. Сэнi лыа. Татшöм бур нырччöмлöн кывкöртöдöн лоис 2020-öд воын Смолянкаын ворсанiн лöсьöдöм.
Зэв нимкодь челядьлы, ёнджыка нин ичöтджыкъяслы, сьöлöм выланыс долыд бать-мамлы, пöль-пöчлы. Гожöмыс таво, майбыр, шоныд, быд лун кылö челядьлöн долыда ворсöм. Танi эмöсь качай, чомъяс, исласянiн, кыр йылö каянiн, пос, дзоля карусель да ворсны-ёнмöдчыны мукöдтор.
Йöзыд öддзисны, водзö вылö налы лоис окота вöчны и ыджыдджык челядь да верстьöлы ёнмöдчанiн. Гöгöрвоисны, мый ставыс на сайын. Сöмын колö водзмöстчыны унджыклы да ёнджыка.
Артур Гарнов.
Снимокъяс Надежда Есевалöн.