Март 8 лун — Нывбабаяслöн войтыркостса лун

[ A+ ] /[ A- ]

Лов кыпöдысь, сибыд ань

Сиктса лавка — йöзлöн аслыссяма паныдасьланiн, виччысьтöг аддзысьланiн. Ньöбасьöм кындзи войтыр чукöртчöны да сёрнитöны öтитормöдтор йылысь. Донса лавкаын ньöбасьысьясöс нюмъялiгтыр век паныдалö мича нима вузасьысь — Снежана Тимушева. Сiйö велöдчылiс пусьысь-пöжасьысьö да вузасьысьö. Вит во нин ань уджалö сельпоын. Сылы сьöлöм вылас воö могмöдны йöзöс эмбурöн да сёян-юанöн. Ветлыны ылö оз ков. Уджыд, майбыр, матын. Ас сиктсаяс кындзи тшöкыда пыравлöны и бокö мунысьяс. Донын мир туй мунö сикт шöрöд, да машинаяслы позьö сувтлыны дзик вузасянiн дорö.
Снежана Юрьевна зэв небыд, лов лöньöдана, сибыд да мича ань. Ичöтдырсянь вöлi ёна водзмöстчысьöн. Сьывны да йöктыны ветлöдлiс важ клубö. Талун социокультурнöй шöринын олöмыс пуö. Снежана семья да удж кындзи волывлö йöктыны «Донса аньяс» котырö. Öнi дасьтысьöны аньяслы сиöм гаж кежлö.
— Гортад пукавнытö век удитан. Йöктiгад и лолыд кыпалö, и дзоньвидзалуныд ёнмö. Да и мичаа йöктöм видзöдысьяслы ёна воö сьöлöм выланыс, — юксьö Снежана.
Снежана Тимушевалы корсьны жöникöс ылiысь эз и ков. Ныв мусмис — Вениаминлы. Кыкнанныс Тимушевъяс. Коймöд во нин кыпöдöны ас керка. Шуда поз тшöтш жö лöсьöдöны ас чужанiнын, кыр йылын. Вениамин уджалö шоперöн, ваялö лавкаö сёян-юан.
Зiль мортыдлöн быдторйыс артмö. А мортыс кö нöшта бур небыд сьöлöма, кыдзи Снежана, сылöн ставыс артмас кык пöв кокньыдджыка.
Артур Гарнов.
Снимок гижысьлöн.

Комментарии:

Добавить комментарий

Свежий выпуск: 28 марта

Осторожно — мошенники!