Йöзöс дорйöмöн

Быдöн ми ньöбасьысьяс, олöм чöжöн вöдитчам унасикас могмöсöн (услугаöн), коркö вештысьтöг, а унджыкысьсö öнiя кадö вештысьöмöн. Дерт, оз ставыс артмы пыр колананогöн, паныдасьлам и ассьыным инöд (право) торкалöмöн. И лои кö тiянкöд татшöмторйыс, медводз отсöгла колö шыöдчыны роспотребнадзорö. Ньöбасьысь-босьтасьысьлысь инöд видзан ставмирса лун водзын ми сёрнитам роспотребнадзорлöн районса юкöнöн веськöдлысь Людмила Юрьевна Савельевакöд.

— Людмила Юрьевна, кольöм воын тi босьтчинныд веськöдлыны роспотребнадзорлöн территориальнöй юкöнöн Таöдз дыр кад чöж уджалiнныд танi. Кутшöм аскылöмъяс лоины тайö каднас?
— Да, буретш кольöм вося октябрь тöлыссянь ме выль должносьтын. И дерт жö, медводз кыла ыджыд кывкутöм. Уджыс миян абу кокни, син улын кутам школа-садъясысь, вузасянiнъясысь, öтув сёянiнъясысь, сикт-грездъясысь сöстöмлун. Миян водзö сувтöдöм могъяссö олöмö пöртöм могысь тшöкыда ветлам командировкаö. Казялам кö кытыськö торкалöмъяс, гижам найöс бырöдöм вылö кад индöмöн предписание да кутам син улын сiйöс олöмö пöртöм. 2005-öд восянь ми видзам и ньöбасьысьясöс налысь инöдъяс торкöмысь.

— Та йылысь и кöсъя сёрнитыштны Тiянкöд талун. Кутшöм падмöгöн локтöны тiян дорö ньöбасьысьяс?
— Миянлы элясьöны и шогмытöм сёянöн, и гортса техникаöн вузасьысьяс вылö. Торйöн нин сотöвöй телефонъяс, ноутбукъяс да мукöд сложнöй техника ньöбигöн. Ми отсалам налы гижны норасяна письмö, дасьтыны шыöдчöм судö. Судлöн корöм серти дасьтам ньöбасьысьлысь инöд торкöм йылысь шыöдчöм вылö кывкöртöд. 2019-öд воын дасьтöма вöлi судö 5 шыöдчöм да 5 кывкöртöд, а кольöм воын коронавирус инфекцияöн висьöмыд чинтiс шыöдчысьяслысь лыдсö да отсöгсö корисны сöмын öтчыдысь. Таво шыöдчылiсны нин куимöн. Шöркодя жö быд во шыöдчылöны ассьыныс инöд дорйöм могысь 30 морт.

— Мый вöчны, лавкаын кö оз примитны норасян шыöдчöмсö, а тшöктöны мöдöдны ньöбöмторсö видлалан шöринö?
— Татшöмногöн вузасянiн чорыда торкалö ньöбасьысьлысь право доръян законъяс. Но тадзи вöчöны быдлаын. Торйöн сьöкыд ньöбöмсянь 15 лунöдз бергöдны вузасянiнö омöль качествоа дзуг тэчаса тöвар. Вузасянiнын зiльысьяс та дырйи радейтöны медводз мöдöдны ньöбасьысьöс видлалан шöринö сiдз шусяна диагоностика вылö, кодöс вöчöны некымын вежон. А сэсся öткажитöны ньöбасьысьлысь корöмсö пöртны олöмö лёк качества тöвар бергöдан кад кольöм вылö ыстысьöмöн. Индöм кад кольöм бöрас жö сьöмсö бергöдны позьö сöмын тöдчана тырмытöмтор вылö ыстысьöмöн.
Ньöбасьысьяс татшöм лоöмторъяс дырйи тшöкыда оз кольны аслыныслы вузасянiнö корöмöн шыöдчöм йылысь эскöдана кабалаяс, да зэв сьöкыд лолö найöс дорйынысö. Та вöсна вузасянiнö лёк качествоа тöвар вежöм йылысь шыöдчытöдз корам волыны отсöгла роспотребнадзорын уджалысь специалистъяс дорö.

— А мый вöчны качество прöверитöм пыдди кö видлалан шöринас вöчасны сiдз шусяна «перепрошивка» либö тöварсö дзоньталасны?
— Татшöмторйыс тшöкыда жö паныдасьлö. И мый майшöдлö, унджыкысьсö тöвар ньöбысьыслысь весиг оз юавны, колö-ö тайöс вöчнысö. Кыдзи татшöмторйыс артмö? Ставыс зэв кокниа. Ньöбасьысьяс пиысь гежöд морт лыддьö кырымалан документъяссö. А сэтчö позьö гижны быдтор. Шуам, качество прöверитöм пыдди вöчны диагностика. Тайö дзик разнöйтор. Закон серти тöварлысь качествосö прöверитны «Потребительяслысь право дорйöм йылысь» законлöн 21 да 22 статьясын индöма торъя кад, а «диагностика» йывсьыс индöм законас некутшöм пасйöд абу.
Сэкжö, качествосö прöверитны тöварсö сетiгöн колö документъясас индылöм нин законлöн статьяяс вылö мыджсьöмöн стöча пасйыны асьнытö, урчитöм удж да сiйöс вöчан кадсö, тöвар йылысь (ним, модель, серия, да тöварыс кö электроника, прошивкалысь версиясö да вöчан кадсö). Тшöкыда тöвар примитысьясыс документас тöдöмöн гижöны тöвар йывсьыс казявны вермытöмсö, шуам, ва веськавлöм, заводса пломба жугалöм, зургысьлöм, чашнитчöм, жугалыштöм йылысь. Ставыс тайö вермас бöрынджык падмöдны тöварлысь качество прöверитöмсö.
Торкисны кö, тiян серти, ньöбасигöн правонытö, корам звöнитны роспотребнадзорлöн миян районса территориальнöй юкöнö 94-4-13 номерö.

— Людмила Юрьевна, кольöм восянь школаясын дон босьттöг быть колö бура вердны начальнöй классъясын велöдчысьясöс. Сiдзкö, тiян содiс могныд?
— Да. Дон босьттöг 1-4 классъясын велöдчысьясöс вердöм вылö правительство чуктöдiс торъя сьöм. Такöд тшöтш миянлы индiс видзöдны колананогöн-ö видзöны тайö сьöмсö. Талун кежлö ми видзöдлiм 14 школаын индöм челядьсö вердöм. Санитарнöй законодательство торкöмсö казялiм быдлаысь. Медводз, колана мындаысь этша вердöны прамöй яйöн, градвыв пуктасöн да фруктыöн. Торкалöны и сёян дасьтiгöн да вердчигöн санитарнöй корöмъясö кутчысянног. Та вöсна сэсся сюрöны сёянысь ковтöм бактерияяс, шуам кишечнöй палочка группаысь да мукöд. Пасъя, мый апрель помöдз миянлы колö видзöдлыны став велöдчанiнсö, кытчö эг на волöй. А татшöмыс 10. Прöверка бöрын вöчöм кывкöртöдöн ми быть тöдмöдам районса юралысьöс, медым сiйö вермис кутшöмкöногöн отсавны учреждениеяслы бырöдны тырмытöмторъяссö, тшöтш и выльмöдны школаса столöвöйясысь оборудованиесö.

— Удж кузяныд тi ветланныд и мукöд районъясö да каръясö. Тiян серти, öткодявны кö, кутшöм серпасыс миян районса учреждениеясын?
— Миян учреждениеяс нинöмöн абу лёкджыкöсь республикаса мукöд районсаысь. Верма шуны, мый мыйсюрöын ми восьлалам водзынджык. Бöръя кадö районысь пöшти став велöдчанiнсö колананог дзоньталöма, найö лöсялöны талунъя корöмъяслы, вузасянiнъясö вайöдöны ва, дзоньталöны культура учреждениеяс. Сöстöмджыкöсь лоины и сикт-грездъяс.
И торйöн тöдчöда, торкисны кö тiянлысь правонытö ньöбасигöн, кора локны отсöгла медводз миян специалистъяс дорö. Отсалам дасьтыны колана шыöдчöмъяс, индам, колiгöн кытчö мунны водзö.
— Аттьö, Людмила Юрьевна да сиктса войтырлысь олöм бурмöдöмын выль вермöмъяс.
Сёрнитiс Ольга Васильева.