Донысь Валерия Михайловна Мишарина таво эштöдас И.П.Морозов нима Сыктывкарса медицина колледж. 2023–öд воын мунiс карö, медым пырны Сыктывкарса университетлöн войтыръяскостса йитöдъяс факультетö. Та могысь школаын велöдчигöн на ачыс содтöд некымын во велöдiс англия кыв. Артмис сiдз, мый факультет тупкысис, и позис пырны сöмын англия кыв велöдысьö. Валерия эз окотит, а сэсся мунiс мамыслöн кок туйöд – бöрйис медицина, медым велöдчыны медсестраö. Ичöтсянь ныв аддзылiс мамыслысь уджсö да тöдiс мый колö вöчны медсестралы: тöждысьны йöзлöн дзоньвидзалун, висьысьяс бöрся да отсасьны налы. Тайö и кыскис.

Валериялöн мамыс, Анна Николаевна Мишарина, уна во сайын помалiс сiйö жö колледжсö. 2007–öд восянь куим челядя мам уджалö Кулöмдiнса шöр бурдöдчанiнлöн челядь юкöнын. Колледжын уна велöдысьыс найö жö, кодъяс вöлiсны 30 во сайын. Сöмын велöдчан кадыс чиныштiс. Водзтi кö медсестраö велöдiсны матö куим во, талун сöмын кык. Донса ныв тöвся сессия эштöдiс зэв бура, ставыс «вит» вылö. Аслас группаас староста. Овлö сiдз, мый звöнитлывлö мамыслы да юасьö лекарствояс и висьöмъяс йылысь.

Валерия Михайловна карса поликлиника да диагностика шöринын практикуйтчигöн врачкöд примитiс висьысьясöс, гижалiс бурдöдысьöн урчитöмторъяс. Больничаын практикуйтчигöн вöчалiс уколъяс, гижалiс висьысь вылö колана документъяс, висьысьясöс дасьтiс операция кежлö да уна мукöдтор.
Медицина колледж эштöдöм бöрын Валерия кöсйö велöдчыны водзö хирурглы отсасьысь медсестраö.
Колледжын велöдчигöн Валерия аддзис уна ёртöс. Нимкодь, мый таво карö локтiс велöдчыны сылöн Донса нывъёртыс – Алёна Тимушева.

Чужанiнас, Дон сиктö, артмö волыны гежöда. Уна кад босьтö велöдчöм да аккредитация кежлö дасьтысьöм. Но выль вося каникулъяс дырйи волiс гортас бать-мам керкаö. Валерия Михайловна серти студенталан кад вежис сiйöс бурланьö, велöдiс овны аслад вынъяс вылö мыджсьöмöн. Том студентъяслы сиö уна вын да терпенньö. Абу кокньыд мунны чужан керкаысь да овны матысса йöзсянь ылын. Но олöмыс вайöдас челядь русянь верстьö кывкутысь мортöдз.
Наталья Тимушева.
Снимок Анастасия Васильевалöн.