Кывзі Т.Чаплыгина да Е.Чупровалысь «Тшак» сьыланкыв да нимкодяси. Ёна жö озыр миян Коми муным и тшакöн, и вотöсöн. Медыджыд озырлуныс — шань коми йöз. Важся коми йöз шулiсны: «Уна кö гебыс — уна тшак лоас». Гебыс таво сьöд. Вöрын кыкысь нин пыравлісны лов горшöдз. Тшакыс вöрас тшöтш жö уна, кöть зырйöн зырт. 20 минут кежлö пыравлім — ведра дона гоб нин сюрис. Водз асывсяньыс вöр тырыс йöз. Ошкыслы нин овнысö некöн. Виж гобыс да гöрд гобыс тшем, быттьö кодкö быд вой кöдзö. Быд воськолын мыччасьöны, мукöдлаас дзонь котыръясöн бызгыльтöмаöсь, быттьö тöдöны, мый 2024 восö Президентыд сиис семьялы. Тшак вылö нырысаяс öдва кыскöны-петкöдöны ягысь дона прöмыс. Кассяна воын век уна тшак да вотöс. Казялöй тайöс. Старайтчöй öктыны сöмын посньыдикъяссö, кыз кока да зумыд юраяссö, чача кодьяссö. Номырöсь гырысьсö кольöй. Коркö ичöтдырйи ме аддзывлі вöрысь пöрысь пöльöс. Сійö вотiс ставсö бöрйытöг. Мамö юалiс: «Фёдор пöль, мыйла нö татшöм тшаксö вотін?» Москва большая пö, шуис олöма мортыд. Ме сэк эг гöгöрво, мыйла тадз сёрнитö… А чипсы с грибами, тшака Ролтон, тшака кубикъяс шыдö да уна мукöдтор вöзйöны миянлы быдлаын. Бурджык аслыд косьтыны да чöсмасьны ас вöчöм сёянöн. Вöрыс ставсö миянлы козьналö.  

Жанна СИЗЕВА.