Кöсъя тöдны

[ A+ ] /[ A- ]

— Пöгибö воштіс петшöр: йöрын быдмö быд пельöсын. Уна ног видлім мынтöдчыны, но весьшöрö. Мый вöчны? 
— Петшöр — быдöнлы тöдса ёг турун. Сійö öдйö паськалö кушинын, но вермö пырны и культурнöй быдмöгъяс костö. Мынтöдчыны сыысь абу кокни, но позьö. Сылöн вужйыс паськалö öдйö да ылöдз. Та вöсна мусö пузлалöй эн зырйöн, а вилаöн: зырйöн ті вундаланныд вужсö уна пельö, и быдöнысь чеччыштас выль петшöр. Пузлалöй мусö, кöні быдмö петшöр, арнас, кынтавтöдз, мед вужйыс колис выліас. Быдмöг кö паськаліс ёна, вольсалöй сы вылö сьöд плёнка, толь либö кыза вевттьöй пилипызьöн. Арнас вевттьöд улын лоас бур му. Но сэтчö кö нинöм онö пуктöй, петшöр зэв öдйö паськалас бöр. 
Позьö пызйыны химия сорасöн. Видзöдöй, мед сэні вöлі глифосат. Позьö пызйыны «Раундапöн», «Фосуленöн», «Торнадоöн», «Ураганöн». Кыдзи киськавны, гижöма дозмук вылас. Но тöдöй: сорасыс виас став быдмöгсö, кытчö сöмын веськалас, сылы веськодь, ёг турун либö дзоридз. Та вöсна резйöй шондіа лöнь лунö, кор абу тöла. Ёг турун дорын кö быдмö бур быдмöг, сайöдöй сійöс мыйöнкö либö вевттьылöй. Асьныд пасьталöй кузь соска паськöм, чышъянасьöй, öчкиасьöй. Уджалöм бöрын быть мыссьöй майтöгöн. 
Сэкжö петшöр — овмöсын зэв коланатор. Том петшöр чöскыд шыдъясöн, салатъясöн. Мичаммö петшöр ваöн мыськалöм юрси. А культурнöй быдмöгъяслы — медся бур вынсьöдан сорас. Ытшкöй петшöр кöйдысассьытöдзыс, чирсöй-посньöдлöй, видзыштöй сутки кымын шонді водзын да пукталöй помидор, öгурцы, клубника да мукöд быдмöгъяс улö. Либö пуктöй посньöдлöмöн 20 кымын литраа бачок джынйöдз да содтöй тырысöдз ва, сиптöй. Вежон куим мысти тіян лоас зэв бур вына сорас, кодöн позьö киськавны град йöрысь став быдмöгсö. Найö тіянлы таысь шуасны «ыджыд аттьö» да нимкодьöдасны бур урожайöн. Сöмын артмöм сорассö быть колö сорлавны сöстöм ваöн: дас литра ва вылö литра джын сорас.

Комментарии:

Добавить комментарий

Свежий выпуск: за 14 ноября