Регыд кутам пасйыны Победасянь тшупöда пас – 80 во. Такöд йитöдын казьтывлам найöс, кодъяс дорйисны Айму да дорисны Победа.

На пиысь Елена Васильевна Напалкова (нывдырся овыс Тимушева). Чужис Кулöмдiн районса Дон сиктын 1923–öд воын квайт челядя семьяын. Вöлiс медыджыдöн. Сылöн батьыс, Василий Андреевич, тшöтш тышкасис Великöй Отечественнöй войнаын. Мунлiс фронт вылö 1941–öд воын нин. Елена öкмыс класс помалöм бöрын уджалiс колхозын. И стöч сэки, 1942–öд воын арнас, нылöс тшöтш нуисны тышкасьны вöрöгкöд. Мамыскöд бöрдiсны войбыд. Мамлы, Домна Михайловналы, дерт, сьöкыд вöлi лэдзны нывсö фронт вылö. Эз вöв кокньыд и Еленалы. Сiйö век мöвпалiс, кыдзи öнi мамыс кутас кутны овмöс да видзны ичöт чойвокöс? Öд гортас колисны мамкöд дзоляджык куим чой да Ёгор вок. Вокыс ёна отсасис тшыг воясад. Пыр вöралiс, кыйис чери, вотчис чойяскöд. Елена Васильевна аслас казьтылöмъясын чайтö, мый сьöкыд уджыс, войнакадся тшыг нисьö пöт олöмыс ёна дженьдöдiс чоявоклысь олöмсö. Война йылысь колхозникъяслы юöрсö вайис сиктсöветса юралысь И.А. Кузнецов. Елена Васильевна бура помнитö, кыдзи сiйö чукöртiс йöзöс клубö, чуксалiс гортын и фронт вылын дорны Победа. Помнитö нывбабаяслысь нора бöрдöмсö, мужичöйяслысь зумыш чужöмъяссö. Быдöн тöдiс, мый страдуйтны, урожай идравны, скöт видзны, мукöд удж вöчны медсясö ковмас нывбабаяслы, пöльпöчьяслы, челядьлы, öд мужичöйяслы колö вöлi мунны тышкасьны фашистъяскöд, дорйыны чужан му…

Водзö лыддьöй апрель 25-öд лунся газетысь.
Наталья Тимушева.
Снимокыс Диана Холоповалöн да Артур Гарновлöн чукöртöмысь.