Мый сэтшöмыс онлайн-урок? Таво тулыс тайö велöдчанногас социальнöй велöдысь Евгения Анатольевна Морохинакöд пырöдчисны Вочса школаысь нывкаяс да зонкаяс. А ышöдiс школаса директор Жанна Валериевна Ревеняла. И медводдзаысь видлiсны ассьыныс сямнысö öтуввезын Россияса банкöн котыртöм сьöм овмöсын тöдöмлун сетан урокъяс вылын. Республикаын тайö туйвизяс петкöдчисны 110 школаысь велöдчысьяс да 16 велöдчанiнысь студентъяс. Сиктсаяс пöвстын вочсаяс лоисны медбурöн.
Февральсянь апрельöдз быд вежон видзöдiсны урокъяс. Эз öтпырйö, а торйöн 5-öд класс, коркö 6-öд да мукöд. Быд онлайн урок бöрын колiс ыстыны вочакывъяс юалöмъяс вылö. Тадзи донъялiсны выльног босьтöм тöдöмлунъяс.
Ставыс лоис 300 урокысь унджык, пырöдчисны матö ставныс, 40 сайö морт.

• Олöмын выльтор — тайö зэв интереснö. Ме велöдчи челядькöд тшöтш, — висьталiс Евгения Анатольевна.
  Быд лун öти и сiйö жö уроксö петкöдлiсны нёль час асывсянь дас кык час войöдз, медым видзöдны окотитысьяс бöрйисны да пуксисны прöст кадö. Тайö вöлi зэв кивыв. Юклöма урокъяссö торъя сюрöсъяс вылö. Тöдмöдiсны банкса картаясöн, кыдзи вöдитчыны наöн, а гырысьджыкъяслы висьталiсны вкладъяс, процентъяс йылысь, кыдзи видзчысьны телепон пыр йöзöс бöбйöдлысьясысь, медым эз перйыны карта вылысь сьöм, кыдзи аслыд колана ног видзны сьöм да с.в. Зэв уна буртор босьтiсны тöд вылö да сюркнялiсны пель саяныс. Арнас велöдасны на водзö, вочсаяс бара на кöсйöны пырöдчыны да паськöдны ассьыныс тöдöмлунъяснысö.
  Евгения Анатольевна уджалö школаын кык во. Мöдöд во велöдчö И.А.Куратов нима педколледжын социальнöй педагогика специальносьт кузя.
• Колöкö и бать-мамлы окота вöлi видзöдны татшöм велöдöмсö? — юалi велöдысьлысь.
• Шыöдчöмъяс эз вöвны. Мунö ставыс дон босьттöг, сöмын колö пасйысьны Россияса банклöн сайт вылас, сэсся пырны да кужны корсьны ссылка кузя коланасö.
• Ылi сикт-грездъясын тшöкыда овлö, мый лёка кыйö öтуввез. Кыдзи тiян школаын, öд колiс велöдчыны быд лун?
• Урокъяс дырйи öтуввез век вöлi бур, уджалiс торксьывтöг.
  Е.А.Морохиналöн тайö абу медводдза конкурс. Велöдчысьяскöд сям видлiс нин районса да республика тшупöдын, эмöсь уна грамота да аттьöалана письмöяс, козьнавлiсны и сертификат. А со таво вермисны.
  Татьяна Чувьюрова.
  Снимок Евгения Морохиналöн чукöртöмысь.