«Кулöмдiн» овмöдчöминса администрациялöн «Север» котыр мöдöд во нин олысьясöс могмöдö поткöдлöм пескöн. Босьтöны оз сöмын кулöмдiнсаяс, но и Кебанъёльса, Носимса, Паспомса, Донса, Кужса, весиг Керчомъяса олысьяс.

Босьтчигöн кö вöлi кер пилитан да чуркаяс поткöдлан öти оборудование, öнi кык нин. Мöдсö республика отсöгöн босьтiс районса администрация да сетiс «Кулöмдiн» овмöдчöминса админстрациялы. Выль оборудованиелы кыпöдiсны нöшта öти лэбув. Водзтi кö сёрнитчöм серти вöрöн могмöдiс öти асшöр уджалысь, öнi квайтöн нин. Вöчöм пес разöдö «Север» котырлöн кык машина, ас техникаöн волöны и олысьяс.

– Уджыс петкöдлiс поткöдлöм пескöн могмöдöмлысь ыджыд коланлунсö. Бур, мый воча мунiс да отсалiс район, – пасйис «Север» котырöн веськöдлысь Александр Иванович Шахов.
Пасъям, республикаын пача керкаясын олысьяслöн эм позянлун донтöмджыка ньöбны керъясöн, чуркаясöн да поткöдлöм пес, брикет да пеллет. Тайö вынсьöдöма республикаса правительстволöн шуöмöн 2017–öд вося декабрын. Районса администрация тарифъяс комитетын дорйис вузöс песлысь дон, а сэнi вынсьöдiсны миянлысь тариф. Олысьяслы сöмын колö овмöдчöминса администрацияысь босьтны справка, кöнi пасъясны оланiнлысь ыдждасö, кымын олысь да уна-ö пес сетсьö во кежлö.

Орччöн вайöм вöрлы ин. Оборудованиеыс ачыс и лэптö керсö, сöмын личкав кнопкаяс вылö. Пилитö и поткöдлö, дасьыс петö да киссьö машина кузолас. Öти оператор бергöдö ставсö, сменаöн зiлис кык уджалысь. Öнi лöсьöдöны мöд оборудованиесö. Уджöн могмöдасны нöшта öти мортöс, босьтасны содтöд операторöс. Талун туйяс пöдсаöсь, оз позь ветлыны ыджыд машинаяслы. Воссясны, да кутасны ваявны вöр, уджыс мунас öдйöджык, оз нин ковмы дыр сулавны öчередын. «Север» котырö шыöдчысьяслы звöнитасны водзвыв да юöртасны, кор ваясны. Сöмын виччысь, петкöдлы, кытчö кисьтны.
Марина Дадашова.
Снимокъяс Кирилл Поповлöн.