Олöмаяс вöсна тöждлунöн

Кокниа-ö бергöдчыссьö социальнöй уджалысьяслы, кодъяс могмöдöны олöма йöзöс — öдвакö. Овлö, прöст здук оз сюрлы налöн. Кыдзи и Кулöмдiнысь Татьяна Александровна Морохиналöн, кодлöн сойборд улын дас пöль-пöч. Сiйöс буретш суи олöма морт дорысь, кодлы, асыв на вöлi-а, удитöма нин пусьыны и вердны сiйöс, да мыськис нин тасьтi-пань. А сэсся öд колö на и вайны колонкаысь ва, пыртны пес да ломтыны-ваймöдны пач, коркö и пывсьöдны, и песласьны. Öтка олöма морт ыджыд арлыда нин, вермытöм, со и лоö аньлы бергöдны керкапытшса став уджсö.

— Тайö пöрысь морт дорас быть колö волыны быд лун, асьсö могмöднысö оз нин вермы да, — висьталiс Татьяна Александровна. – Луннас став колана уджсö сылы вöча, а рытнас бара на усяс дум вылö: ставыс-ö бур сылöн, мыйкö сёйлiс-эз, кыдзи асьсö кылö. Овлö, сьöлöм вылын сьöкыд да, ветла видзöдлыны весиг. Асывнас локта сы дорö: но, аттьö Енмыслы, ставыс бур.

Тöждысьö дзик быттьö матысса вöснаыс. Дыр кад сы бöрся дöзьöритöмнад збыльысь ас мортöн кодь и лоис. А öд сыысь кындзи нöшта öкмысöн на, ставныс ёна ыджыд арлыдаöсь жö. Кыдзи сылöн тöждлуныс да шоныдлуныс тырмö быдöнлы – сьöкыд гöгöрвоны. На лыдын дзик вермытöмыс нöшта кыкöн на. И на дорö луннас колö волыны кыкысьöдз. Медшöр мытшöдыс сыын, мый ставныс олöны сикт пасьталаын, öта-мöдсьыс ылынöсь, да котралöмыс босьтö содтöд кад. Но тайö, видзöдöмысь, аньöс оз ёна майшöдлы.

Овлö, дерт, сьöкыд, но Татьяна Александровна дас сайö во нин дöзьöритö олöмаясöс да велалiс, öнi натöг овнысö нин оз вермы. Сьöлöмыс доймö на вöсна. Торйöн овлö сьöкыд, кор найö висьöны: корас «тэрыб отсöг» либö врачöс, виччысяс найöс, кытчöдз оз локны, налöн велöдöмöн-индöмöн бурдöдас, медсясö öткаясöс, колiгöн дiнаныс на пукалас, кытчöдз оз кокньöдышт. Кодлöн эм рöдвужыс, найö видзöдлывлöны-а.

Олöма йöзлы мойвиис татшöм ыджыд да шань сьöлöма отсасьысьöн. Сы вылö пö став лачаыс, сытöг налы некыдз, эскöдöны найö. Быд лун виччысьöны сiйöс. Ань сёрмыштас кö кодкö дорын дырджык, звöнитчö нин мукöдыслы, мед эз майшасьны весьшöрö, ог пö вунöд тiянöс, бытьысь локта. И тадзи лунысь-лун, шойччöг тöдтöг.
Бур уджысь, олöма йöзлы ыджыд отсöг да тöждлун сетöмысь Татьяна Александровналы йöзöс социальнöя могмöдан управлениесянь вичмöдiсны почёт грамотаяс да аттьöалана гижöдъяс.
Галина Нестерова.
Гижысьлöн снимок вылын Татьяна Александровна Морохина олöма морткöд.