Шуда бать

Тöдмасьöй: Аня – енбиа ныв. Радейтö англия кыв да физкультура, ёна водзмöстчö школаын, пырö Россияса школьникъяслöн öтмунöмö. Бергöдö керка пытшкöсса уджъяс, вуджис сизимöд классö. Родион – дзоляджык вокыс помалiс 1-öд класс. Радейтö йöктыны, гортас пыртлö ва да пес.
Кык челядя бать Григорий Николаевич Боровский, быдтысьö öтнас. Мамныслöн сьöкыд висьöмысь кулöм бöрын колiс кыдзкö кутчысьны олöмас. Григорий Николаевичлöн киыс лэччылiс муöдз, но кужис босьтчыны да сувтны кок йылас. Надзöникöн кутiс артмыны и пусьöм, и керка пелькöдöм. Челядь быдмыштiсны, заводитiсны отсасьны.
— Öтлаын ветлöдлам вотчыны, корöсьла, быдтам и градвыв пуктасъяс, шойччигмоз би вылын жаритлам яй. Весиг челядьлöн ёртъясыс волывлöны чöсмасьны, — радпырысь юксьö Г.Н.Боровский.
Григорий Николаевич, позьö шуны, радейтö челядьсö и бать, и мам пыдди. Ветлö школаö быд собранньö вылö, пырö бать-мам комитетö, ворсö ордйысьöмъясын, а коран кö, и сцена вылö петас, киподтуя да зiль.
Тöвнас поткöдлö сиктсаяслы пес, гожöмнас вотчö да мукöд уджъяс бергöдö. А сиктад гортгöгöр уджыд оз и бырлы.
Пыралi гöститны гортас. Паныдалiс Аня нылыс, корис ыджыд жырйö да вöзйис пуксьыны паськыд диванö. Гöгöр дзим-дзурк, кылiс чöскыд пусьöм–пöжасьöм кöр. Дерт нин, нывка мыйкö öтуввезысь корсьöмöн пöжалö. Сiдз и эм, перйис пачысь пирöг да корисны юны чай. Дзоляджык вокыс эз вöв гортас, велосипедöн ризъялiс ёртъяскöд.
Григорий Николаевич зэв варов морт, ньöти эз öтдорт, кор звöнитi да кори сёрнитны. Висьталiс ставсö кыдзи эм, нинöм дзебтöг. Нылыс кывзiс да содтышталiс.
Гожöм шöрын кöсйöны ветлыны Печораö шойччыны, Григорийлöн чой ордас. Висьталiсны, мый карас абу ни öти ном, да зэв лöсьыд. Весиг завидь босьтiс, град вылад ноксьыныд кутшöм бур, пель водзад кö некод оз зiньгы да виртö оз кöсйы нёньыштны ни öти гаг. Но Аня чуйдiс, мый медся бурыс сэнi батутъяс да челядьлы ворсанторъяс. А Печора юыслысь помтöм дортöм визув васö видзöдiгöн сьöлöмыд шойччö.
Кык челядя батьлöн мамныс бырöм бöрын заводитчис выль олöм, кöнi паныдасьлö уна сьöкыдлун. Найöс венны верман сöмын семьялöн öтувъялунöн. А татшöм батьыдкöд челядь кылöны асьнысö коланаöн да шудаöн.
Июнь кызьöд лунö батьлöн лун. Сиам мед и водзö лоö олöмныс сöстöм да дзоньвидза Дереваннöйысь Григорий Николаевичлöн да сылöн быдтасъяслöн.
Татьяна Чувьюрова.
Снимок гижысьлöн.