Ваполка. Тайö ичöтик сиктыслöн, коді вöлі 18 нэм заводитчöмсянь 1973–öд воöдз, эмöсь и аслас геройяс. Социалистическöй Уджвывса Герой Виссарион Ильич Шешуков – СССР-са вöр да пу обработайтан промышленносьт министерстволöн Помöсдінса леспромхозын вöр лэдзысь.

Чужлiс 1930–öд вося март 24 лунö Коми АССР-са Кулöмдін районлöн Ваполка грездын. Уджавны заводитiс 1946–öд воын леспромхозлöн кылöдчанiнын керъяс вылö пасъяс пукталысьöн. 1951-1954–öд воясын служитiс армияын. Сы бöрын 1954–öд восянь уджаліс пöрöдчысьöн, пилитчысьöн, бригадирöн.
1956–öд воын вöр лэдзан юкöнын котыртiсны выль уджаланног, лöсьöдiсны ичöт комплекснöй бригадаяс. Виссарион Ильич веськöдліс Помöсдінса леспромхозлöн Вольскöйса лесопунктын öти татшöм бригадаöн. 1960–öд воын пырис КПСС-ö. Сизим вося (1959-1965) планлöн кывкöртöдъяс серти вермöмъясысь пасйисны Ленин орденöн.

СССР Верховнöй Сöвет Президиумлöн 1971–öд воын май 7 лунся индöдöн вöр да пу обработайтан промышленносьт сöвмöдöм кузя вит вося планлысь заданиеяс зэв бура олöмö пöртöмысь Виссарион Ильич Шешуковлы сетiсны Социалистическöй Уджвывса Герой ним, Ленин орден да «Серп да Молот» зарни медаль.

1971-1982–öд воясын – Помöсдінса леспромхозлöн Помöсса лесопунктын комплекснöй вöр лэдзан бригадаса пöрöдчысь да бригадир.
Ыджыд тöдчанлун сетіс выль техника велöдöмлы, выль уджаланног пыртöмлы, велöдчис вöр пöрöдан да трелюйтан выль методъясö, удж котыртöмö. Сылöн бригадаыс медводдзаяс лыдын кутiс вöдитчыны бензомоторнöй пилаöн. Воысь воö вöчисны урчитöмысь унджык, 1971–öд воын бригадалöн вöліс 2,5 сюрс кубометр вöр, а öкмысöд пятилеткалöн коймöд воын (1971-1975) – нёль сюрс кубометр нин.
СССР-са 9–öд созывын Верховнöй Сöветса депутат (1974-1979).
1985 вося мартсянь – союзса тöдчанлуна персональнöй пенсионер. Тайö статуссö сетлiсны уджын да государство водзын ыджыд вермöмъясысь зэв этшалы.
Оліс Помöсдінын, 1999–öд воын муніс Сыктывкарö. Кувсис 2006–öд вося апрель 21 лунö Самараын.
Коми АССРса народнöй овмöсын заслуженнöй уджалысь.
Нина Шатохина.
Снимок гижысьлöн чукöртöмысь.