Кольöм нэмся 70-öд воясын унаöн локтiсны Комиö бокиысь: кодъяскö нажöвитчöм, а кодъяскö и бур олöм да шуд корсьöм могысь. На лыдын и лунвылын, шоныд Узбекистанлöн Ташкентын чужöм Рахман Кадырович Юлдашев. Кыдз ачыс шуö, некор абу кывлöма ни тöдлöма уна лымъя, чизыр тöла да чорыд кöдзыда Коми мусö, да абу чайтлöма, мый олöмыслöн визулыс ваяс сэки Дереваннöй посёлокö.

Служитiс Украинаса Кировоградын. Асьсö петкöдлiс бура, эз янöд рöдсö. Но 1966-öд воын чужан муас вöлi землетрясение. Киссис уна керка, вошис, кулiс уна морт. Юр сюянiнтöг колисны и матыссаяс. Шуис кольччыны Украинаö. Пырис уджавны стрöйка вылö. Öтлаын зiлис öти мужичöйкöд, кодi и тöдмöдiс Раиса нывкöд. Сiйö олiс карсянь неылын, рытъяснас котравлiс кино да танцы вылö. Сэнi жö удж бöрын шойччис том морт. Ныв да зон пыр и вöрзьöдiсны öта-мöдныслысь сьöлöмнысö, эз нин вермыны öта-мöдтöгныс. Öтласисны да, том гозъялы сетiсны патера. Чужис ныв, шуисны Юляöн. Но гозъялöн пуис том вирыс, окота вö-лi видлыны мыйкö выльтор, мыйкö тöдтöмтор. Рахман Кадырович вöзйысис мунны тöдтöм ылi муö. Буретш кывсис, мый чукöртöны войвылын уджавны окотитысьясöс. Босьтiсны колана кöлуй, сöлiсны поездö да тöвзисны шудлунла. Тайö вöлi 1973-öд воын.
Сыктывкарсянь мöдöдлiсны кодöс кытчö. Юлдашевъяс да нöшта квайт семья вöзйысисны Кулöмдiн районö. Татчöдз лэбисны сiдз шусяна «кукурузник» самолётöн. А водзö… А водзö сынöд туй эз вöв, сöмын пидзöсысь на джуджыдджык няйт, кытi вермисны ветлыны сöмын гырысь машинаяс да тракторъяс. Татшöм машина вылö и пуксьöдiсны гозъяöс да нöшта куим семьяöс. Шоперыс Дереваннöйысь, бура тöдiс быд гуран да мыльк, öлöдiс, мый оз ло кокни. Мунiгöн сибдiсны, кералiсны коз лапъяс да шыблалiсны кöлесаяс улö, тадзи вель дыр туркитарки Рахман Кадырович да Раиса Васильевна локтiсны корсьны шуда олöм. Томъяс да эз повзьыны сьöкыдлунъясысь, эз бергöдчыны бöр да татчö и вужъясисны. Выль воысьяслы сетiсны кык судта керкаысь патера.
Стрöитчыны кужысь Рахман Кадыровичöс дзик пыр босьтiсны уджавны лесопунктö. Бур кывйöн казьтывлö коми йöзöс. Кöть и шуöны, мый лунвывса йöзлöн öбичаыс чорыдджык да крутджык, но ылi муысь локтöм морт кужис ладмöдчыны ставныскöд. Öта-мöдлы отасьöмöн и пырöдчис уна национальносьта посёлоклöн олöмö да уджö.
Недыр мысти чужис пи, шуисны Юрийöн. Кор Рахман Кадыровичлы юöртiсны мамыслöн кувсьöм йылысь, пиыскöд и ветлiс чужанiнас. Комиын олiгöн тайö лоис медводдза и медбöръя ветлöм. Кытшалысь вöр-ваыс, сöстöм сынöдыс да рам коми йöзыс Юлдашевъяслы сэсся лоисны матыссаясöн.
Водзö нöшта чужисны нёль ныв: Татьяна, Алёна, Марина да Александра. Ставныс ветлöдлiсны ясли-садйö. Гозъя уджалiсны лесопунктын. Рахманöс ыстылiсны велöдчыны трактористö, да тракторöн вöр петкöдiс шойччöг вылö петтöдз. Украинаса ань сяммис вöчны быдтор, эз пов сьöкыдысь. Дзоньталiс бурдöдчанiн, школа, выль лэптöм керкаясын штукатуритiс стенъяс да вöчис мукöд удж. Öтув уджалiсны гозъя, быдтысисны да асьныс тшуписны тыр-бур олöм. Сьöкыд воясö видзлiсны мöс, порсь да чипанъясöс, пызан вылын век вöлi ас йöв да яй. Гортса овмöс бергöдiсны öтув. Челядь тшöтш пуктiсны турун, орччöн вöлiны картупель пуктiг-идралiгöн, удж тырмылiс ставныслы. Бать-мамыс кодь жö вöлiны зiльöсь. Сöвмисны-верстяммисны, сувтiсны кок йыланыс да и жбыркнитiсны шоныд позйысь. Öнi сöмын Алёнаыс олö орчча керкаас да тшöкыда волывлö отсасьны бать-мамыслы. Но и асьныс оз вевъявны. Раиса Васильевна ветлöдлö вöрö вотчыны, а Рахман Кадырович гортас, уджыд тай пыр сюрö. Волывлöны да тöждöн кытшалöны и пöльöн да ыджыд мамöн шуысь дас кык внук-внучка.
Менам волiгöн ас кыöм джодждöра вывтi котралiс вит арöса Надюк внучкаыс да шöпкöдiс пельö, ме пö тшöтш отсася радейтана ыджыд мамлы: чышка джодж да верда Дени нима понйöс. Син улö усисны ыджыд мича розаяс, кодъяс буретш мичаа дзоридзалiсны. Тайö аньлöн ловкыпöданаторйыс.
Узбекистанса мужичöй да Украинаса ань öтлаын вуджисны став сьöкыдсö и бурсö. Кыдзи и мукöд локтысьяс пуктiсны пай вöр овмöс да посёлок сöвмöмö. Тшöкыда казьтылöны воддзасö да казьтывлöны сöмын мичасö да сöстöмсö. Мед жö тайö ставыс отсалас налы и водзö кутчысьны олöмас, дыр на нимкодясьны öтвылысь гажа вöльнöй светнас.
Татьяна Чувьюрова.
Снимокъяс Юлдашевъяслöн чукöртöмысь.