Матыстчö видз-му овмöсын уджалысьяслöн лун. Ме кöсъя казьтыштны кольöм нэмся 70–öд воясся кадсö. Ми вöлiм томöсь, 17,5 арöсаöсь, а совхозад уджыс вöлi тырмымöн. Руч совхоз правлениеöн веськöдлiс Роман Данилович Шегай. Кывтыд отделениеын бригадирнас вöлiс Егор Иванович Расов, кыдзи висьталiсны челядьыс, батьныс уджалiс 30 сайö во. Уна вося бура уджысь пасйисны «За преобразование Нечерноземъя РСФСР» медальöн, сетiсны Коми АССР-лöн народнöй овмöсса заслуженöй уджалысьлысь ним. Бригадир шулiс миянлы, уджыс пö уна да гижöй пö заявление, мед пырны совхозö. Миянöс примитiсны. Вöчлiм быдпöлöс уджсö: öтруб ваясны – новлам-пыртлам, турун ваялам, силос пыртлам ферма дорö. Тулыснас карысь машинаясöн ваясны кöйдыс, да удж бöрын рытнас чукöртчылам да пыртлам. Кöдзан кадö новлам кöйдыс анькытш сора семечки, мукöд пöлöс кöйдыс.

Кывтыд отделениеын öти кадö уджавлiс том ныв, практикантка, ме пö тшöтш ветла кöдзанiнас. Водзтi вöлi кöдзöны уна му, лунвылас шöр туйсянь. Аддзылiс муяссö да горöдiс, тiян пö танi сы мында муыс, веськалi пö мöд Украинаö. Медым видз вылын вöлi уна да бур турун, «Белорусь» тракторöн коявлiсны удобренньö.

Гожöмнас пуктiсны турун, мукöдъяс вöчисны силос, зэра поводдя дырйи сенажсö вöчисны веськыда видз вылас. Ва турунсö ваявлiсны лайк гуранъясö, «ДТ» гусеница трактор топöдлiс сенажсö. Мед унджык вöлiс мöсъяслы кöрымыс.

Кор оз зэр, ПМК котырлöн ыджыд трактор видз вылысь пöрöдлiс пуяс, весавлiс, кытi рассялiс. Видзöдан, да видз помыс оз тыдав. Турун заптöм бöрын мöсъяссö йирсьöдлiсны арöдзыс.

Арнас, октябр тöлысьын, силос чöвтiгöн матыстчылiс бригадир да шуис: талун субöта, пывсьöймыссьöй да аски лэччылöй собрание вылö клубö. Аскинас лэччим клубö. Медводзöн сёрнитiс директор, став уджалысьсö чолöмалiс праздникöн. Сы бöрын управляющöй, а сэсся кодi кöсйис, босьтiс кыв. Сы бöрын, кыдзи вöлi водзтi, сетавлiсны премияяс: кодлы еджыд дöрöм, кодлы тöв кежлö пеля шапка, кодлы платтьö дöра, кодлы гын сапöг, ставныс вöлiны дöвöльнöйöсь.
Алексей Расов, пенсионер.
Руч.
Редакциялöн чукöртöмысь снимок вылын: Егор Иванович Расов.